شاهد.. تامر أمين لوزير إسرائيلي: "اذهب إلى الجحيم"

طالب الإعلامي تامر أمين، بمحاسبة وزير الأمن القومي الإسرائيلي إيتمار بن جفير بعد تصريحاته عن إعدام الأسرى الفلسطينيين.

وقال أمين خلال برنامج 'آخر النهار' المذاع على قناة النهار': 'في أمور بتحصل الواحد بيجد من الصعوبة أنه يصدقها، الجريمة شيء لا يمكن السكوت عنه، وقوع الجريمة أو الدعوة لجريمة أو التحريض على جريمة دا شيء يضعك تحت طائلة القانون'.

وأضاف: 'أول إمبارح في إسرائيل هذا المدعو بن جفير الوزير المتطرف في الحكومة الإسرائيلية، الأخ بن جفير طالب بإيه بقى؟، طالب بأن يتم إعدام كل الأسرى الفلسطينيين الموجودين في السجون الإسرائيلية، الشيطان الرجيم نفسه لا يجرؤ أنه يجيله الفكرة دي'.

وتابع: 'تفتق ذهن بن جفير عن هذه الفكرة، وقال أنا بطالب بإعدام كل الأسرى والمساجين في السجون الإسرائيلية ومقدم بيها مشروع قانون أمام الكنيست الإسرائيلي عشان يتوافق عليه، ين جفير قالهم ادرسوا المشروع ووافقوا عليه عشان ننفذه'.

وواصل: 'اللي قاله حتى لو الكنيست موافقش على مشروع القانون مجرد الدعوة وتقديم مشروع قانون جريمة دولية متكاملة الأركان، الدعوة دي ضد الإنسانية وحقوق الانسان واتفاقيات جنيف والاتفاقيات الدولية ومبادئ الأمم المتحدة وقوانين الحرب'.

وأوضح: 'ضد كل حاجة ولكن هي إسرائيل تهتم بأي قانون بأي اتفاقات، إسرائيل الطفل المدلل للمجتمع الدولي التي ترى نفسها فوق القانون، وبالتالي أفعل ما أشاء وأنتهك القوانين كما أشاء منتهى الصلف والوحشية، وأنا عايز أعرف المنظمات الدولية اللي مصدعانا إزاي سابت الكلام ده بقاله 72 ساعة من غير ما تقوم الدنيا ومتقعدهاش'.

وأكمل: 'الدول طبعا لازم تعمل ودن من طين وودن من عجين، عشان دي إسرائيل دلوعتنا، النهاردة تم الإفراج عن مدير مجمع الشفاء في غزة، لم يثبت عليه شيء يقوم بن جفير يطالب بالقبض عليه مجددا، وحبس مدير السجن الإسرائيلي اللي سمح بالإفراج عنه دا مش راجل موتور دا راجل دموي الدم عنده تعطش ليه'.

وذكر: 'أتمنى من المجتمع الدولي وجامعتنا العربية تعمل أي حاجة وتقدم بلاع للمحكمة الدولية والأمم المتحدة وتقولهم الحقوا دي جريمة لازم يتحاسب عليها مش نستنى لما تتحقق انتوا مستنيين لما دعوته تتنفذ، وساعتها المجتمع يهب ويقول يا خبر أبيض الأسرى ماتوا'.

واختتم: 'مجرد الدعوة جريمة التحريض على العنف والقتل والتمييز جريمة، عقوبتها الحبس والا هما لا، يا بن جفير اذهب إلى الجحيم دا، واحنا مؤدبين وكل واحد يترجمها الترجمة اللي تصلح على السوشيال ميديا'.