عمرو أديب عن وقف دعم اللاجئين: يجب أن تتحدث مصر قانونيا

علق الإعلامي عمرو أديب على قرار مفوضية اللاجئين التابعة للأمم المتحدة تقليص مخصصات اللاجئين الموجودين في مصر.

وقال أديب خلال برنامج 'الحكاية' المذاع على قناة 'أم بي سي مصر': ' المفوضية كانت بتدفع للاجئين 170 مليون دولار والسنادي مدفعتش 70% منهم والـ 170 مليون دولار متعملش أي حاجة وهناك عجز في المدفوعات ويبدو أنهم مش هيدفعوا'.

وأضاف: 'قرروا وقف تسجيل اللاجئين يعني أنت عايز كمصر تروح تسجل اللاجئين وهو قرر أنه مش هيسجل وطبعا مصر تتحدث عن 10 مليون مصر تتحدث عن الضيوف فيهم قد ايه لاجئين عمرنا ما عرفنا'.

وتابع: 'تتحدث الإدارة المصرية عن 10 مليون ضيف والمفوضية لا تعترف ألا بمليون وقررت متدفعش، الأرقام بتقول إن عدد كبير من الاخوة السودانيين بعد تحرير الخرطوم بدأوا يرجعوا إلى السودان طبقا لكلام المفوضية أن غالبية اللاجئين سودانيين وابتدوا يرجعوا'.

وواصل: 'الشيء المهم اللي لازم مصر تقدر تعمله بجد وبلا مجاملة هو حصر عدد اللاجئين أنت عندك مليون ولا 10 مليون؟ السيد رئيس الوزراء كان واضحا وقال احنا محتاجين دعم للاجئين'.

وأوضح: 'على الجانب الاخر الاتحاد الأوروبي وضع مصر السنادي انها من الجهات المأمونة للجوء بيقول ياجماعة ياللي موجودين في المنطقة دي لو أنت لاجئ مصر وعدد من الدول هم من الدول الآمنة فاذهبوا إليها لاجئين'.

وذكر: 'يجب أن تتحدث الإدارة المصرية بطريقة قانونية بعيدا عن المجاملة أنا عندي كام لاجئ؟ الضيف ده موضوع تاني حد بيعلم ولاده في مصر أهلا وسهلا حد عنده بزنس في مصر أهلا وسهلا دول مش لاجئين'.

واختتم: 'كم يدفع الاتحاد الأوروبي لمصر دعما في مقابل أن مصر دولة أمنة للاجئين؟ الاتحاد الأوروبي يقولك انزلوا مصر مش عندي ومصر تمنع الهجرة غير الشرعية وهو في أوروبا أرخص له أنه يدفعلك دعم بدل ما المواطن ده يجي عنده هو عنده مكلف جدا ومشاكله كتير'.