أحمد موسى عن تصريحات متحدثة صندوق النقد بشأن مصر: "ربنا هيكرمنا بعيد عنكم"

انتقد الإعلامي أحمد موسى تصريحات المتحدثة باسم صندوق النقد الدولي والتي أشارت فيها إلى ربط الشريحة التالية من التمويل بتطبيق الشروط التي حددها الصندوق.

وقال موسى خلال برنامج 'على مسؤوليتي' المذاع على قناة 'صدى البلد': 'صندوق النقد الدولي… مافيش فايدة بصراحة عمل امبارح متحدثة مؤتمر صحفي بتتكلم فيه على مصر، وبصراحة الكلام اللي قالوه كلام مستفز إنه مش هندي مصر الشريحة اللي جاية إلا لو خدوا إجراءات خاصة بأسعار الوقود والطروحات الحكومية والتراجع مش عارف إيه حاجات بصراحة أي مواطن يشوف الكلام ده هو ماذا يريد الصندوق من مصر في هذا التوقيت؟ استمرار الضغوط علينا'.

وأضاف: 'ما انت النهارده لما تيجي تقول يا حكومة اعملوا ده، ولو ما عملتوش مش هديكم الشريحة الـ 274 مليون دولار! كلام فارغ يعني بالنسبة لمصر كلام فارغ 274 مليون دولار ولا حاجة، مبلغ بسيط جدًا هل ده يخلينا إن احنا ناخد قرارات فعلًا؟ يعني الصندوق يطلب وأنا أقول له حاضر؟'.

وتابع: 'الطروحات كلنا شغالين عليها، والدولة ورئيس الوزراء الأسبوع اللي فات اتكلم، والدولة وإجراءاتها والقطاع الخاص يدخل، يعني يبقى هو يقود قاطرة التنمية خلال الفترة القادمة 70%، 80%، ولو حتى 90% ما فيش أي مشكلة خالص لكن موضوع الوقود والأسعار والناس ده ملف في غاية الأهمية، وفي غاية الخطورة كمان'.

وأكمل: 'انت النهارده بتضرب مثل بإضافة إن كل اللي بيحصل ده استهداف لمصر هنفضل نضغط عليك بما فيها الطلب النهارده شوف حتى العناوين واضحة جدًا صندوق النقد يشترط، شروط على مصر يشترط خفض دعم الوقود وتسريع الطروحات لصرف 274 مليون دولار لمصر إيه يعني؟ وقال لك المرة اللي فاتت كان في مراجعة في يوليو أجّلناها عشان احنا ما التزمناش طب وأنا هلتزم بإيه؟ التزم تاني إيه؟ ما احنا زودنا الوقود مرة واثنين وثلاثة وأربعة وسبعة وتمانية ما هو المطلوب الآن؟'.

وأوضح: 'صندوق النقد بيقول لك حان الوقت لتنفيذ مصر إصلاحات أمال احنا بنعمل إيه؟ إصلاحات اقتصادية أعمق؟ والمراجعة الخامسة والسادسة على القرض قريبًا وبيتكلموا الشهر ده أو الشهر الجاي، وقال لك لو مصر ما عملتش ممكن ما نديهاش يا سيدي متشكرين والله ربنا هيكرمنا بعيد عنكم، وربنا هيكرمنا بعيد عن الصندوق بإذن الله تعالى.'