أحمد موسى عن حادث قطار مطروح: هو كامل الوزير اللي كان سايق؟!

انتقد الإعلامي أحمد موسى إلقاء الاتهامات على الفريق مهندس كامل الوزير نائب رئيس مجلس الوزراء للتنمية الصناعية وزير الصناعة والنقل، حال وقوع أي حادث يخص النقل في أي وقت.

وقال موسى خلال برنامج 'على مسؤوليتي' المذاع على قناة 'صدى البلد': 'إحنا في مصر، لو حصل حادث أتوبيس، يدفع ثمنه وزير النقل حادث قطار، يدفع ثمنه وزير النقل عربية ميكروباص، يدفع ثمنه وزير النقل إحنا بلد أي حادثة نحمّلها للوزير'.

وأضاف: 'يعني ألاقي حالة كده يقول لك الفريق كامل وزير.. هو الفريق كامل كان سايق القطر مثلًا؟ يعني كان يقود هذا القطار الفريق كامل وزير؟ اللي بيتكلم، أنت عندك مشكلة مع الفريق كامل؟ تاني بقول عندك مشكلة معاه؟'.

وتابع: 'هل في العالم… لسه من أسبوعين أو تلاتة في ألمانيا، وكنت عرضت لحضراتكم هنا في البرنامج، قطر في ألمانيا اتقلب. ما لقيناش ولا سمعنا إن وزير النقل هناك استقال ولا حد يقلل من الحادث على الإطلاق، ولكن كمان بعض الأصوات عندنا أول ما يحصل حادث يقول لك وزير النقل الفريق كامل الوزير'.

وواصل: 'أنت بتعمل منظومة، هذا القطار أو غيره من القطارات أو هذا الحادث أو غيره من الحوادث في أي بلد، سواء مصر أو غير مصر، مسؤولية أي وزير أو أي مسؤول إيه هي؟'.

وأكمل: 'لما تلاقي بعض الناس يكتبوا على طول، هو مصدق، وحاطط وزير النقل قدام عينيه هو عايز يخلّص من وزير النقل مش عايز يبقى موجود عنده مشكلة معاه أنا بقول هذه أمور معتادة، طبيعي'.

وأوضح: 'ناس عندهم أزمة إن سيادة الفريق كامل الوزير لسه من يومين في السخنة، عامل شغل غير مسبوق سواء في النقل أو في الموانئ، إنجاز غير مسبوق شغل المفروض يخلص 2030، بتخلصه السنة دي أو السنة الجاية ناس بتجري، بتشتغل، ناس بتنتحر في الشغل'.

وذكر: 'لكن في ناس قاعدة فقط لا غير، تنتظر أي حادثة – لا قدر الله – عشان ينهشوا في هذا الرجل، وينهشوا كمان في الدولة كلها، وينهشوا في الشغل اللي بيتم في أنت النهارده عامل أنفاق؟ أيوه عامل هو انت هتقول لأ مش عامل'.

وأكمل: 'حادث صعب؟ مأساة؟ صحيح ولكن هل كل حاجة نحمّلها للوزير؟ ليه؟ هل هو ده المسؤول؟ وللأسف، شايف لجان شغالة، وقنوات إعلامية شغالة، مستنية أي حادثة عشان تقول هي دي الفرصة، الفرصة تيجي لهم، عندك ناس ميتة، عندك ضحايا، عندك مصابين'.

واختتم: 'الأولى إننا نعزي الناس وندعي للمصابين بالشفاء ادعوا لهم يخرجوا، يروحوا لبيوتهم، يقوموا بالسلامة'.