عمرو أديب: "أبحث عن مصري يحب إسرائيل.. هتلاقيهم خمسة عندهم تخلف عقلي"

أكد الإعلامي عمرو أديب أن تحرير فلسطين أمر مهم للغاية ولكنه ليس فرضا على المصريين فقط ولكن على كل العالم الإسلامي بالكامل.

وقال أديب خلال برنامج 'الحكاية' المذاع على قناة 'أم بي سي مصر': 'تحرير فلسطين حاجة عظيمة ولكن هل هو فرض عين على المصريين فقط؟ هل هو قال يا مصريين ولا يا مسلمين؟ كل الجيوش عقيدتها مش أنها تموت كل الجيوش دلوقتي عقيدتها أقل إصابات ممكنة'.

وأضاف: 'احنا عندنا الروح والعقيدة والاستشهاد ولكن لازم الشهيد ده أقوله أنت استشهدت ليه؟ الناس اللي كانت بتكافح الأرهاب دي أقدر أقوله أنت استشهدت ليه ولكن الزج بالناس في أشياء غير محسوبة وغير واضحة وغير مخطط ليها'.

وتابع: 'اذكر دولة في المنطقة كلها يتم الهجوم عليها أكتر من مصر، حرب مصر سلام مصر مشكلة اقتصادية مصر مؤامرات مصر طيب هي مصر خدها مداس؟ مصر دي أم الدنيا وقوة للعالم العربي كله يوم ما تحتاج إليها تلاقيها'.

وواصل: 'السياسة والحكمة لها علاقة بأن أنت تقدر تستخدم قوتك في الوقت اللي تحتاجه هل في حد النهاردة مصر بالنسباله عملية سهلة؟'.

وأكمل: 'اللي درس جغرافيا سياسية هيعرف أن الحرب مع مصر مش سهلة، هل السلام مع إسرائيل دا شيء جيد؟ المصريين اللي عملوا السلام مع إسرائيل كان عندهم مبدأ ذكي جدا وهو صباح الخير ياجاري أنت في حالك وأنا في حالي'.

وأوضح: 'عملنا اتفاقية سلام ولكن كل واحد في حالة، المصري أنا مش عايز منك حاجة أنا خدت أرضي وباي باي شالوم مش عايز أشوفك هنا تاني'.

واختتم: 'اه بنتقابل وننسق حاجات على الحدود ولكن عمرك ما هتلاقيني معاك أو بحبك ابحث عن مصري يحب إسرائيل هيبقي في خمسة عندهم تخلف عقلي كده معروفين بالاسم'.