أبطال "ريستارت" يكشفون كواليسه ورسائله.. تامر حسني وباسم سمرة ومحمد ثروت

في سلسلة لقاءات خاصة ضمن برنامج 'سبوت لايت' الذي تقدمه الإعلامية شيرين سليمان عبر قناة صدى البلد، تحدّث أبطال فيلم 'ريستارت' عن كواليس التصوير، ومضمون الفيلم، وروح العمل الجماعية التي جمعت فريق الفيلم خلال تحضيره لطرحه في موسم عيد الأضحى.

تامر حسني: 'دخلنا العرض بتومناية واحدة.. ورضا البحراوي مفاجأة الفيلم'

عبّر النجم تامر حسني عن سعادته الكبيرة بطرح فيلم ريستارت، مؤكدًا أن كل فرد في الفريق بذل جهدًا ضخمًا خلال التصوير. وقال مازحًا: 'كل الناس كانت بتسأل: هتدخلوا العرض راكبين إيه؟ قولتلهم هندخل تومناية سوا'، في إشارة لروح التعاون التي جمعت فريق العمل.

وأضاف حسني: 'بحب فريق العمل جدًا، وتعاونّا طول فترة التصوير بروح حلوة وحقيقية، والحمد لله الفيلم خرج بالصورة اللي كنا بنحلم بيها'.

وعن الأغنية التي تجمعه بالمطرب الشعبي رضا البحراوي داخل أحداث الفيلم، قال تامر: 'رضا نجم شعبي كبير، وصوته مميز جدًا. كنت حاسس إنه الأنسب للأغنية، وبالفعل حصلت الكيمياء المطلوبة بينّا وربنا كرمنا'.

واختتم حديثه بتعليق طريف عن حفلته الأخيرة: 'الحفلة دي ما كانتش حفلة، دي كانت فرح! الجمهور واقف جنبنا سنين، وأقل حاجة نقدمها له إننا نشتغل على كل تفصيلة ونفاجئه'.

باسم سمرة: 'الفيلم بيمس كل بيت مصري.. وتامر فنان دؤوب'

أما النجم باسم سمرة، فأعرب عن سعادته بالتجربة، خاصة أنها تمثّل أول تعاون له مع تامر حسني. وقال: 'تامر فنان جميل، ومجتهد جدًا على شغله، والكواليس كانت ممتعة جدًا'.

وتحدث باسم عن مضمون الفيلم قائلًا: 'ريستارت فيلم في منتهى الأهمية، بيمس كل بيت مصري. فيه رسالة واضحة، لكن بيتقدّم في إطار كوميدي، يعني فيه فكرة وقرصة ودن وفي نفس الوقت هنضحك ونستمتع'.

وأنهى حديثه بدعوة الجمهور لمشاهدة الفيلم: 'اتفرجوا على الفيلم، هيعجبكم جدًا، وإن شاء الله تتكرر التجربة'.

محمد ثروت: 'شرف كبير أقف قدام ميمي جمال.. والفيلم بيفكر ويضحك'

من جانبه، قال الفنان محمد ثروت إن مشاركته في ريستارت كانت من التجارب المميزة في مسيرته الفنية، مضيفًا: 'الفيلم بيتناول موضوع شائك جدًا، وهو تأثير السوشيال ميديا على حياتنا، لكن بشكل ساخر وخفيف. الناس هتضحك، وفي نفس الوقت هتفكر'.

وأشاد ثروت بزملائه في العمل قائلًا: 'سعيد جدًا بالشغل مع تامر حسني، وباسم سمرة، وهنا الزاهد، وميكا، وعصام السقا، وكمان الأستاذة ميمي جمال اللي وقوفي قدامها شرف كبير جدًا، قدمنا سوا مشاهد بطابع كوميدي وكنت فخور بيها'.

وتحدث عن تعاونه الأول مع المخرجة سارة وفيق، قائلًا: 'أول مرة أشتغل معاها، بس هي مخرجة متمكنة جدًا، وعندها إحساس عالي بالكوميديا اللي مكتوبة في الورق'.

وختم حديثه بتهنئة للفنان تامر حسني: 'مبروك يا تيمو، الفيلم تعبنا عليه كلنا وربنا يكرمنا ونكسر الدنيا'.

كما كشف عن أحدث أعماله، وهو فيلم 'روكي الغلابة' بطولة دنيا سمير غانم ومحمد ممدوح، مؤكدًا استمراره في تقديم تجارب متنوعة داخل السينما المصرية.