«ملك التسالي».. غُنا وخير في حصاد «اللب السوبر» من بداية أغسطس

«يا بتاع التسالي يا بتاع القزقزة.. بيقولوا اللب بتاعك علاج للنرفزة.. يا بتاع القزقزة فكرتني بزمان أيام التلمذة.. يا بتاع القزقزة»، كلمات كانت تشدو بها النجمة لبلبة، ينشدها الفلاحون وقت حصاد محصول «اللب».

«موسم حصاد اللب من مواسم الخير، وبننتظره من السنة للسنة لأنه بيكون فيه ربح كويس، والمقابل إللي بيطلع من بيع المحصول إللي بنصرفه على زراعة المحاصيل الشتوية، وحاجة بتشيل حاجة، وزوجتي وأولادي لازم كل سنة ييجوا يحضروا الحصاد لأنهم بيحبوا اليوم ده»، بهذه الكلمات عبّر إبراهيم فراج، أحد مزارعي محافظة كفر الشيخ، عن فرحته بالحصاد.

يحكي «فراج» عن خطوات حصاد محصول اللب: «بيدأ حصاده في شهر أغسطس وبعد عملية الحصاد بنسيب بطيخ اللب إللي بيخرج منه المحصول فترة في الشمس، وبعد كده بتبدأ عملية تكسير البطيخ داخل ماكينة مخصصة لكده، وإللي بتنتج اللب كمنتج نهائي، وبعد كده بيتم فرده على مفرش في الأرض لتجفيفه في الشمس لفترة، وبعدها بتكون المرحلة الأخيرة، وهى تعبية المحصول في شكاير، وتوريده للتجار أو أي شخص عايز بالكيلو».

يتراوح سعر كيلو اللب السوبر من المزارع إلى التاجر أو المستهلك من 100 إلى 120 جنيهاً بحسب «فراج»: «بيكون فيه إقبال كبير على شراء اللب بعد الحصاد لأن فيه بعض التجار بيصدّروه للخارج، وكمان فيه زباين بيكون لهم أقارب في الخارج بيقلوا اللب ويسفروه لهم لأن اللب السوبر المصري معروف في كل مكان».

ينتظر إبراهيم حمادة الصاوي، طالب جامعي، موسم حصاد اللب لمساعدة خاله إبراهيم فراج: «كل سنة باجي أساعد خالي في حصاد محصول اللب، وحقيقي بيكون يوم حلو أوي، وكلنا بنتجمع الصبح بدري أنا وأولاد خالي ونبدأ نساعده، وأنا دوري إني بفرد اللب على المفرش عشان يتجفف، وبعد كده بنقعد نتغدى مع بعض في وسط الأراضي الزراعية، وبنشم هوا نضيف، وفي نفس الوقت بنجدد صلة الرحم».

ومن جهته، أكد المهندس عبدالفتاح سليم، مدير عام الإرشاد الزراعى بمديرية الزراعة بكفر الشيخ، أنّ اللب السوبر هو أحد المحاصيل الصيفية التي تزرع في شهر أبريل ويبدأ حصاده في شهر أغسطس من كل عام، لافتاً إلى أنّ المساحة المنزرعة بمحصول اللب لعام 2024 هى 48 ألفاً و634 فدان لب.