"كل اللي بيقوله كذب".. اشتباك على الهواء بين مصطفى كامل ومسلم

شهدت حلقة برنامج 'كلمة أخيرة' على قناة ON، الذي يقدمه الإعلامي أحمد سالم، مواجهة ساخنة بين الفنان مصطفى كامل نقيب المهن الموسيقية، ومطرب المهرجانات مسلم، تبادل خلالها الطرفان الاتهامات بشأن أسباب استمرار قرار إيقاف مسلم عن الغناء منذ مارس الماضي.

بدأت الأزمة بعد أن نفى مسلم ما تردد عن تنظيمه وقفة احتجاجية أمام النقابة، مؤكدًا في مداخلة هاتفية: 'مكانش فيه وقفة احتجاجية، كل الكلام ده إشاعات، هو إحنا أيام التحرير علشان أعمل وقفة؟ أنا رايح النقابة أحل مشكلتي مش أعمل مظاهرة.'

وأوضح مسلم أنه كان بصدد تسوية خلافه مع شركة إنتاج كبيرة، قائلًا: 'كان عندي مشكلة مع شركة، وخلصت العقد، واللي أعرفه إني لما أخلص المشكلة أرجع أشتغل، وكنت رايح النقابة علشان أرجع رسمي، لكن حصل سوء فهم.'

وأضاف أن بعض أفراد فرقته الموسيقية كانوا ينتظرونه هناك لحل الأزمة، لكن تصادف وجود عدد كبير من الصحفيين مما أدى لتداول أخبار غير دقيقة عن احتجاجه، مؤكدًا أن قوات الأمن ألقت القبض على بعض أعضاء فرقته قبل الإفراج عنهم لاحقًا.

من جانبه، رد مصطفى كامل خلال المداخلة نافيًا صحة تصريحات مسلم، وقال بلهجة حادة: 'كل اللي بيقوله كذب، أنا بعتبرهم ولادي وهو يعلم كده، لكن من أول يوم ليّ في النقابة وهو مشاكله ما بتخلصش، وأنا سهلت له الأمور واديته الكارنيه، وبعدها وصلتني عشرات الشكاوى من شركات ومنتجين.'

وأضاف النقيب أن الأزمة ليست مع شركة واحدة كما قال مسلم، موضحًا: 'تعددت الشكاوى من محافظات مختلفة وشركات كبيرة بتقول إنه مخلّ بتعاقداته، وأنا قعدت معاه وقلت له صفي أمورك وهنرجعك فورًا، لكن ده ما حصلش.'

كما كشف عن لقائه الأخير بمسلم في منزله، قائلًا: 'جالي بيتي من حوالي شهر ونص، وقلت له روح خلص مشاكلك كلها، وأنا هقف جنبك. لكن مشكلته إنه بيكرر الأخطاء وبيظن إن النقابة بتظلمه.'

في المقابل، تمسك مسلم بروايته، مشيرًا إلى أنه حل مشكلته مع الشركة المنتجة بالفعل، وقال: 'مصطفى كامل فوق دماغي وأبويا، بس والله العظيم ما قلت لحد يتظاهر، أنا خلصت مشكلتي مع الشركة، وبيقول في شركات كتير وأنا ما مضتش غير مع شركتين بس، روتانا وسلطان الشن، وبيتي باظ والناس اللي معايا مش لاقية تاكل.'

واختتم مصطفى كامل المداخلة بالتأكيد على أن النقابة لن ترفع الإيقاف إلا بعد انتهاء كل النزاعات القانونية والتجارية قائلًا: 'أنا مش ظالم، لكن عندي مستندات وشركات بتقول إنها انظلمت. لما يجيب المخالصات من كل الشركات، هيرجع تاني يشتغل فورًا.'