مها أحمد ترد على سؤال بشأن موقف زوجها من ظهورها على التيك توك

ردت الفنانة مها أحمد، على السؤال الذي يرد لها من قبل النقاد حول موقف زوجها الفنان والدكتور مجدي كامل من ظهورها المستمر على تطبيق «تيك توك»، وتصريحاتها بأنها تعمل على التطبيق من أجل المال، وطلبها المشاركة في أعمال فنية، خاصة في ظل الهجوم الذي تتعرض له من حين إلى آخر.

وقالت مها أحمد خلال فيديو نشرته عبر حسابها على تطبيق تيك توك: «أنتوا بتسألوني فين الدكتور مجدي يصرف عليكي.. الدكتور مجدي بيصرف عليا من زمان أوي، الدكتور مجدي مكفي وموفي، الدكتور مجدي بيجيب الفلوس كده ويحطها قدام مراته ويقولها اتصرفي، أعملي اللي إنت عايزاه وهاتي اللي نفسك فيه».

وأضافت: «الدكتور مجدي واخد مراته ممثلة بتشتغل فهو عارف أوي إن لازم اشتغل مسألتهوش ليه أيام ما هو كان بيمثل وأنا بمثل بتخلي مراتك ليه تشتغل ما تقعدها ستتها في البيت ولا حلو السؤال دلوقتي عشان التنمر زاد، ما تسألوا الدكتور مراته بتشتغل دكتورة ليه ما تسألوا الصحفي مراته بتشتغل صحفية ليه وبتنزل وبتبقى مراسلة وتروح وبتيجي وبتشتغل على تيك توك».

واستكملت مها أحمد حديثها قائلة: «أرجع أقولكم كان ممكن أقصف جبهتكم وأقولكم وإنتوا مالكم، ولكن اللي أنا مستغربه ليه أن هناك الكثير من الفنانين والفنانات نشطاء على حساباتهم بـ تطبيق «تيك توك» منهم جمال حجازي، عايدة غنيم، سهام جلال، وائل علي، وائل علاء، وفاء عامر، أيتن عامر، نرمين ماهر، بدرية طلبة، علا رامي، أحمد الدمرداش، عمرو عبد العزيز، وفاء مكي، النجم محمد هنيدي، وآخرين.. كل دول إنتوا سبتوهم ومسكتوا في مها أحمد كل دول ملهمش أزواج مسألتهمش ليه مبيصرفش عليكي إشمعنى مها أحمد ومجدي كامل عارفين ليه عشان مجدي كامل محترم مش عايز يرد لأنه ليه وجهة نظر أن كلها حسابات وهمية منعرفش مين وراها عارف أنكم عالم افتراضي مش عارفين مين بيهاجمنا حتى رأيه إني مردش».

يذكر أن مسلسل بيت الشدة، آخر أعمال الفنان مجدي كامل، وتم عرضه عام 2022، وهو من إخراج وسام المدني، وتأليف ناجي عبد الله، وشارك فيه وفاء عامر وأحمد وفيق وإيهاب فهمي ومحسن منصور وغيرهم من الفنانين.