مصطفى بكري: التعليمات واضحة لأي سفارة مصرية.. الاعتداء يقابل بالحزم والمعاملة بالمثل

أكد الإعلامي مصطفى بكري أن الرئيس عبد الفتاح السيسي يبذل جهودا كبيرة مشيرا إلى أنه يتحمل الكثير من أجل الوطن.

وقال بكري خلال برنامج 'حقائق وأسرار' المذاع على قناة 'صدى البلد': 'الرئيس السيسي مستحمل الكتير امبارح راح في زيارة للمملكة العربية السعودية، وقعد مع الأمير محمد بن سلمان، وكان الفريق كامل الوزير على رأس فريق آخر موجود يتباحثوا في المجلس التنسيقي الأعلى ويحطوا خطط للمستقبل'.

وأضاف: 'لكن بعض المتآمرين كل شوية ينزلوا ويقولوا الحق مش عارف إيه وده يضرب من هنا وده يضرب من هناك لكن في مصر أو السعودية، هناك قيادة رشيدة تدرك تمامًا معنى الأمن القومي، وتفهم حقيقة العلاقة بين البلدين'.

وتابع: 'لما بنتفرج على بعض اللي إحنا عارفينهم، والمتآمرين بتوع اللجان الإلكترونية اللي بره، بنلاقيهم قاعدين يفبركوا فيديوهات ويعملوا مش عارف إيه، ويبعتوا عيالهم يروحوا يسيطروا هنا ويقفوا هناك ويقتحموا هناك'.

وواصل: 'لما عيل تمسك لأنه كان بيعتدي على مكتبنا في نيويورك، قلبوا الدنيا وقالو الحقوا! طفل صغير طب هو الطفل الصغير ده طلع من بيته ليه؟ لو لقى أب أو أم في البيت ما كانش خرج لكن تعتدي على جزء من أرض دولة وبعدين تقول الحق خدوه؟ لا'.

وأكمل: 'التعليمات لدى كل السفارات المصرية واضحة أي بني آدم يقرب يتمسك من أفاه ويتسلم للجهة المعنية وأي سفارة يحصل عليها اعتداء، إحنا هنعامل بالمثل مصر مش هينة… ومصر مش لعبة'.

وأوضح: 'لكن مصر في اللحظة دي عايزة رجال، عايزة ناس تقف بكل قوة وإيمان ناس تفهم الدولة دي شغالة إزاي، والقيادة السياسية بتعمل إيه مش تاخدنا لموضوعات جانبية يا سيدي، كلنا عندنا تحفظات على مئة حاجة ونتكلم عليها وما بنسكتش وعندنا أمل في حل كثير من المشاكل'.

واختتم: 'هاهو الوضع الاقتصادي الحمد لله التضخم بينزل شوية، الدولار بيتراجع أمام الجنيه المصري شوية، وهنوصل لأهدافنا الأساسية بس عمر السيسي ما هيعمل حاجة لوحده'.