مجدي يعقوب: عايز الناس تفتكرني بإني شخص عادي تفانى في خدمة الإنسانية

كشف السير مجدي يعقوب عن بعض الأمور التي مكنته من الوصول إلى أن يكون من رموز المجتمع المصري، ويصبح شخصية ناجحة وملهمة للجميع.

وحل السير مجدي يعقوب ضيفا في برنامج خاص على قناة أون سبورت رفقة محمد صلاح قائد منتخب مصر ونجم ليفربول الإنجليزي.

وقال في تصريحات لقناة أون سبورت: لابد أن يكون لدي ثقة في اللي بعمله، وكل ما أوصل لنجاح طموحي يرتفع للهدف الأعلى منه، وكأنك تتسلق جبل الإبداع وبعد تسلق الجبل عندما تصل إلى القمة تجد أن هذه ليست القمة وهناك قمة أخرى أعلى منها.

وأردف: أحب الناس تفتكرني بإن أنا إنسان عادي بس تفانى في خدمة الإنسانية.. وفيه ألم كبير في المجتمع والناس تفتكر إن حياتي كرستها في خدمة الإنسانية'.

وتابع السير مجدي يعقوب: 'أكتر شيء يبسطني المزيكا الكلاسيكية بتاعة باخ وموتزرت، وفى المزيكا العربية، بحب عبد الوهاب وغيره والزهور وكان واحدة من الشغل بتاعي عندي مجموعة ضخمة من نبات الأوركيد.. والأوركيد زي الإنسان، ولازم تخدمه، ومن الأمور اللي بتبسطني الزراعة والمزيكا وجمال الطبيعة'.

وعن الأمور التي يحب القيام بها، أكد: أحب أروح أسوان لأني لما بروح المركز بيشجعني جدا وبشوف الأبحاث اللي بيعملوها الشباب بطريقة جميلة وبيعملوا الحاجات الي بعلمهالهم بطريقة احسن مني وبيطلعوا 100 ورقة في السنة ودي من الحاجات الجميلة'.

واصل مجدي يعقوب: 'ساعات بقعد في القاهرة لأني بعمل مركز جديد في القاهرة بجوار الهرم ودي، وأكتر حاجة بتشجعني في مصر الكفاءات الموجودة من أيام قدماء المصريين ولسه موجودة ولازم ندي الناس الفرصة لأن الكفاءات موجودة ولازم نطورهم انهم يوصلوا للحاجة اللي عايزينها والبلد محتاجهم'.

ووجه السير مجدي يعقوب نصيحته للأجيال القادمة، قائلا: نصيحتي للجيل الحالي يكون عندهم حب للي بيعملوه ويختاروا حاجة يكونوا عايزين يعملوها، بس لازم هو او هي اللي يختارها ويعملها وبعدين يحبها، زي كل يوم يقول لازم اروح للحب بتاعي وعندي شغف للي بعمله وحاجة تانية يكون عندهم مثابرة لان الأمور لا تأتي بسهولة وايمان في نفسهم وميسمعوش الكلام اللي الكل بيقولوه.

استطرد: آخر حاجة وهي الأهم وهي التواضع في المجتمع والعمل لأننا عارفين فيه حاجات اكتر واكتر ممكن نعملها في المستقبل وانا مش احسن من حد ولازم نشتغل سوى عشان نهزم المرض والجهل بس لازم نشتغل مع بعض ومنزقش حد.

وشدد: كل انسان عنده موهبة مختلفة ومش كلنا زي بعض وكل واحد ليه رؤية مختلفة، والرسالة اللي اقولها إن إيه الحاجة اللي انت هتختارها وموهوب فيها ولازم نساعد الأطفال انهم يلاقوا الموهبة بتاعتهم هل هي لعب الكرة على اعلى مستوى أو الموسيقى أو الرسم أو الطب أو أي حاجة تانية.