إبراهيم عيسى عن اجتماع رئيس الوزراء مع قامات فكرية: مفيش نتايج حقيقة

علق الإعلامي إبراهيم عيسى، على اجتماع رئيس مجلس الوزراء الدكتور مصطفى مدبولي مع عدد من القامات الفكرية والاقتصادية للحديث بشأن بعض القضايا.

وقال عيسى، خلال برنامج 'حديث القاهرة' المذاع على قناة 'القاهرة والناس': 'النهاردة في تصرف وسلوك مشكور السيد رئيس الوزراء بيجتمع بعدد من القامات الفكرية سواء في المناقشات الاقتصادية أو الشؤون الداخلية والخارجية السيد رئيس الوزراء بيقابل قامات فكرية عشان يناقش معاها الوضع ودا شيء لازم نشكره ونمدحه'.

وأضاف: 'تلاقي مسؤولين لغاية أسبوعين فاتوا بيقولوا كلام عكس اللي قالته القامات الفكرية اللي قعدوا معاها بل بينقدوا هذا الكلام ويعملوا عكسه فين الفايدة؟ اللقاءات مطلوبة ومشكورة وتفضل كريم ولكن هو فضل مجلس؟ أو كلمتين بنخرج ونقول والدولة تقول شفتوا احنا بنستمع وصدرنا مفتوح؟ صدرتكم مفتوح ولكن عقولكم مش مفتوحة'.

وتابع: 'عايز حاجة واحدة سواء على الصعيد السياسي أو الاقتصادي، أي حوار مع الدولة جاب نتيجة انتهي إلى إجراءات ملموسة غيرت في وضع سياسي أو وضع اقتصادي؟ طريقة الانتخابات أو نعمل انتخابات ازاي يقولك ممكن ألف وممكن باء نعمل انتخابات قائمة نسبية والا مطلقة فردي والا مش عارف ايه والدولة والحكومة اللي تختار يبقي عمل ايه الحوار فيما يخص الشكل السياسي'.

وواصل: 'الإفراج عن المحبوسين أدي 100 أو 200 ونحبس آخرين أنت نقول محتاجين انفتاح سياسي والأصوات المحجوبة تظهر وتتحجب أصوات تانية أمال فين الحوار؟ فين نتيجته'.

وأوضح: 'قانون الانتخابات والإدارة المحلية والمفروض يطلع ولا طلع ولا نزل ومحطوط في تلاجة الفاكهة بتاعة فيلم الفتوة حاجة مذهلة أي شيء ينتج عنه فعل حقيقي للأمان أو تغيير استجابة للحوارات مع القامات الفكرية والسياسية دي في شتى المجالات'.

وأوضح: 'في المجال الاقتصادي ولا أي حاجة حصلت أنا واثق النهاردة الدكتور زياد بهاء الدين قعد قال نفس الكلام اللي قاله في المؤتمر الاقتصادي واجتماعه مع رئيس الوزراء واللي قاله قبل كده في اجتماع مع أي مسؤول'.

واختتم: 'كل أسبوع بيعدي بيزود درجة مصداقية اللي قاله هؤلاء الفقراء؛ فين بقي وثيقة ملكية الدولة هما قالوا اللي اتقال في موضوع تخارج الدولة من الاقتصاد خرج حاجة؟ الدولة راحت اشترت حاجات؛ قولولنا امارة للحوار احنا مش عايزين نيأس من الحوار ومش عايزين نقف قدام فكرة أن الدولة تفتح صدرها وتنفتح أمام الشخصيات السياسية والفكرية'.