يتساءل المهندس البيئي حمدي حشاد اليوم عن قطاع البطاطا وعلاقته بموجات الحرارة المتتالية عبر العالم، و في ما يلي قراءته كما كتبها باللهجة التونسية:

'كيفاش صيف سخون ينجم يصغر كبر كعبة البطاطا و يبدل حسابات قطاع كامل؟

*في بلجيكا، بعد ثلاث موجات حرّ و شهرين متواصلين من الجفاف في صيف 2026، صابة البطاطا نقصت بحوالي 40% مقارنة بـ2025 و كي نحسبوا المردود في الهكتار نلقاوه أقل بـ20% من معدل عدة سنوات و برشا من البطاطا اللي تلمّت جات أصغر من العادة هوني الحجم و الكبر عندو قيمة اقتصادية خاطر بين 85 و90% من الإنتاج البلجيكي يمشي للتحويل الصناعي و مصانع الفريت تشترط حدّ أدنى لحجم كعبة البطاطا و الفلّاح ينجم يلم صابته و يلقى جزء منها صعيب يتباع للمصنع اللي كان يحسب عليه.

*فرنسا زادة عاشت موسم صعيب التقديرات الرسمية في أكتوبر تحطّ صابة بطاطا التخزين أقل بـ22% من الصابة القياسية متاع 2025، مع تراجع المساحات المزروعة و مردود تضرّر من الحرّ و الجفاف

*و في هولندا، الصابة نقصت بـ17% مقارنة بالعام اللي فات أما بقات قريبة من معدل عشر سنين غادي المساحات المزروعة تقلّصت و المردود في الهكتار نقص بحوالي 3% فقط و زيد الأرقام هاذي توري كيفاش نفس الصيف ينجم يعطي نتائج مختلفة من بلاد لبلاد.

البطاطا كمحصول استراتيجي؟ حسب منظمة الأغذية و الزراعة أكثر من مليار إنسان ياكلوا البطاطا بانتظام و برشا منهم يعتمدوا عليها يوميا و هي ثالث أكثر محصول غذائي متاح في العالم بعد الرزّ و القمح يعني كي تتضرر الصابة الحكاية تمس دخل الفلّاح و تزويد المصانع و تمس زادة غذاء حاضر بصفة منتظمة في موائد برشا عائلات.

في تقديري أكثر تفصيل مهم في حكاية بلجيكا هو كبر كعبة البطاطا خاطر باش نفهموا أثر موجة حرّ على الفلاحة يلزم نسألوا زوز أسئلة قدّاش لمّ الفلّاح؟ و قدّاش من اللي لمّه ينجم يبيعه؟ '.

ح.ح