هكذا نقلت الاستاذة المحامية سهام دلدول اليوم الخبر الذي أنزلته زميلتها:

'أنقل المعني بالموضوع

'منوبي موقوف من سبتمبر 2025 مع مجموعة من الموقوفين على ذمة ملف تبييض اموال

من غير ما ندخل في التفاصيل كيفاش منوبي خاطيه وما عندو حتى علاقة بالموضوع اما نجم نقول انو قاضي التحقيق عند ختم البحث اكتفى بتوجيه تهمة جناحية ديوانية ، تهمة تنجم تناقشها قدام المحكمة وتخرجو منها عدم سماع الدعوى.

'فتكم بالحديث، قدمت مطلب افراج قبل ختم البحث وقاضي التحقيق وافق على الافراج خاطرو موش متاع ايقاف ، وهوني بدات رحلة العذاب !

'النيابة استأنفت قرار الافراج ! قلنا ميسالش ! هذاكا دورها ! توا كي نمشيوا لدائرة الاتهام توا يروح !

'نزيدوها رحلة عذاب لانتظار تعيين جلسة امام دائرة الاتهام ! بعد شهرين تعينت جلسة ! عايلتو الكل تستنى ! يصدر القرار بنقض قرار الافراج وابقاء الموقوف تحت مفعول بطاقة الايداع !

'نرجعو لقاضي التحقيق نستناووه يختم البحث وتعدا رمضان والعيد والراجل يستنى !

ايا تختم البحث بتجنيح التهم لاغلبية المتهمين بما فيهم منوبي الا متهم واحد توجهتلو تهمة جنائية !

'النيابة ما استينفتش ! فرحنا ! لكن خسارة المتهم الي عندو تهمة جنائية هو الي استينف ! يعني بالسيف علينا باش نتبعو مع دائرة الاتهام مرة اخرى !

'جاء العيد الكبير وتعدا ونستناوا في التعيين ! ايا تعينت جلسة ! قدمنا مطلب افراج مع امل كبير في انو الدايرة تفرج عليه !

بالطبيعة الامل يكون كبير خاطر منوبي عندو تهمة جناحية ضد الديوانة وقدمنا ما يفيد وجود مطلب صلح والنيابة موش مستينفة !

'وتجي الصدمة !!! اقرار قرار ختم البحث يعني دايرة الاتهام مقتنعة انو منوبي عندو تهمة جناحية ديوانية لكن برفض مطلب الافراج !!!

جات العطلة القضائية !!!! ما فماش دوائر صيفية باش تنظر في الملف ! قالك استنى سبتمبر تتعينلو جلسة وتوا يروح !!!

'العايلة صبرت وقعدنا نجريوا صيف كامل باش الملف يتعدا المسار الاداري بين كتبة الدوائر باش نجموا نعينولو جلسة !!!!

'البارح منوبي مات في المرناقية من السخانة !

'نحب نقول على البوست هذا ربي يكون في عون زميلتي موش ساهل راهي مريضة بيه الموضوع والله يرحمه و يصبر عائلته و ان شاء الله الظروف تتغير في القضاء و ما يحيط به خاطر حتى أحنا تعبنا و مرضنا معاكم'.