أعلنت الفنانة بسنت صيام، عبر حسابها الرسمي بموقع تداول الصور والفيديوهات «إنستجرام»، عن انتهائها من أداء شعائر العمرة للمرة الثانية، وإهداء ثوابها للفنانة الراحلة سعاد حسني، مشيرة إلى أنها كانت تخطط لأن تفعل هذا منذ الطفولة.

وشاركت بسنت صيام، مقطع فيديو عبر حسابها الرسمي على «إنستجرام»، تكشف من خلاله عن أداء العمرة بالنيابة عن الفنانة الراحلة سعاد حسني، قائلة: «وعدت ووفيت يا ست سعاد، الحمد لله وربنا يتقبل، العمرة التانية اللي عملتها كانت لسعاد حسني، وعد كنت وعدته من وأنا صغيرة إن أول ما ربنا يكتبلي عمرة هعملها واحدة».

وأضافت بسنت صيام: «حبي ليها مش حب عادي اللي يعرفني عارف ان بيتي كله صورها عندي لبس و شنط و حاجات كتير عليها صورها، أنا حبيت الفن منها و أنا صغيرة كنت عايزة أمثل عشان أمثل افلامها بس مش هو ده الحب أنا بحبها اللي هو ديماً بترحم عليها وادعيلها واقرالها قرآن».

وتابعت: «طول عمري شايفة اني معنديش هدية اكبر ولا احلى من العمرة اهديها بيها و الحاجة الوحيد اللي ممكن تكون هي محتاجاها و كمان هي معندهاش أولاد، وللأسف على قد ما الناس كلها بتحبها الناس مبتفتكرش تترحم ولا تدعي للفنانين معرفش ليه».

وواصلت: «أنا مكنتش ناوية اتكلم في الموضوع ده عشان دي حاجة بيني و بينها و بين ربنا بس بقالي شوية بضايق و بستغرب اوى ازاي الناس تكون بتحب فنان او فنانة اوى و يجروا عشان يتصوروا معاهم و في نفس الوقت يقطعوا فيهم و يشتموهم و يستحلوا الكلام في عرضهم كدة، بجد حاجة مخى مش فاهمها».

وأوضحت أنه «كله كوم بقى و لما يبقى الكلام ده على حد أتوفي و الفكرة ان ديماً الناس دي بتتكلم بالدين طب ده حتى الدين بيقول أذكروا محاسن موتاكم، نفسي تاخدوها حاجة كدة و انتوا بتتفرجوا على التليفزيون ولقيته ممثل بتحبوه و توفى خدوا عشر ثواني اقروله الفاتحة و لو يا سيدي شايف ان اللي بيعمله حرام قول لنفسك كدة معناه انه محتاج الدعوة اكتر».