نجلاه يوسف في تدوينة و الياس في فيديو على الخط.

في التدوينة التالية التي نشرها اليوم على حسابه الخاص بالفايسبوك، روى يوسف الشواشي ما حصل له من تعطيل بخصوص الحصول على استمارة التزكيات لوالده غازي الشواشي بصفته مواطنا يتمتع بجميع حقوقه المدنية و السياسية وهو ما يخول له الترشح للانتخابات الرئاسية المقبلة:

'فمّا قاعدة في القانون تقول 'من أمكنه الأكثر، أمكنه الأقل'.

« Qui peut le plus, peut le moins »

اليوم مشيت للمقر المركزي لهيئة بوعسكر الي لاهية بالانتخابات في البحيرة 2 للحصول على استمارة التزكيات لغازي الشواشي بصفته مواطن تونسي متمتّع بحقوقه المدنيّة و السياسيّة و عندو الحق في الترشح للانتخابات الرّئاسيّة.

هزّيت معايا كيما طلبت الهيئة صورة شمسيّة و نسخة من بطاقة هويّة للمترشّح.

هزّيت زادة توكيل قام بيه الوالد ليّ أنا من مكان اعتقاله ل'تمثيله امام مختلف الادارات العموميّة و البلديّات و مراكز البريد و الهيئات'.

عاد قدّمنا هاك الوريقات و الجماعة ترعبوا ههههه

قالولنا استنّاونا في الاستقبال حتى نشاوروا مكتب الشؤون القانونيّة: ضربنا نص ساعة نستنّاو و الجماعة طالعين هابطين للشؤون القانونية و التاليفونات تضرب و بعد رجعولنا قالولنا 'التوكيل هذا عام و لازمكم توكيل خاص ينص على تمثيلي لوالدي في استخراج استمارة التزكيات'.

معناها التوكيل العام الي نمثّل بيه الوالد قدام الادارات و الهيئات و الادارات العموميّة ما يقضيش و لازم توكيل لتمثيله في استخراج استمارة التزكيات ههههه

بطبيعة الحال هزّيت معايا عدل منفّذ قام بمعاينة الي صار خاطر كل شي كان متوقّع من هيئة شاددها بوعسكر هههه.

معناها هيئة انتخابات تخدم بعقليّة ڨاتلك ڨاتلك..

تجيب أوراقك كاملة و توكيل، يقلك لا..

حتى كان تجيب توكيل ينص على التمثيل في الانتخابات الرئاسيّة، يطلعولك بطلعة جديدة..

الي صار اليوم حبّينا نورّيو بيه كذب الهيئة هذي و اعضائها الي يدوروا في الراديوات و يقولوا الي حق الترشح مضمون للجميع..

عباد موش فاهمة الي ممكن ياسر بعد أكتوبر تتقلب المشامية و أغلبهم سيقع تتبّعهم قضائيّا'.