كشفت أسما ابنة الفنان شريف منير عن أسباب حذفها لجميع صورها عبر حساباتها بمواقع التواصل الاجتماعي، بعد أن أثارت حالة من الجدل بين متابعيها.

ونشرت أسما شريف منير عبر حسابها بموقع تبادل الصور والفيديوهات «إنستجرام» مجموعة صور جديدة وعلقت: «شلتي كل صورك ليه؟ عشان عايزه أشارك معاكم حاجة تفرق، تفرق مع شخص واحد بس! طب و هو إيه يعني اللي هيفرق في الصور دي؟ أول حاجة عايزة أوصلها من الصور دي، أنها من غير أي أديت أو فلتر، ودي حاجة أنا في صراع دايم فيها، عشان بقيت بحب شكلي بفلتر أكتر و ده شيء محزن، فمحتاجة أحس أني حرة من الفلاتر والأديت عشان أشجع بنات تكون حسه أحسن».

وأضافت:«تاني حاجة في صور من شغلي ومشروعي اللي تعبانة فيه جداً و محتاجة اشاركوا معاكم عشان أشجع الناس أنها تأخد خطوة في أنها تبدأ من الصفر عادي مهما كانت مكانتها الاجتماعية، تالت حاجة مشروعي الأصغر هو الفخار، و ده أنا عملته عشان أشجع المنتجات اليدوية الطبيعية الصحية و عشان أنا دلوقتي بختار أغلب اختياراتي في الحياة أي حاجة راجعة للطبيعة».

واستكملت أسما شريف منير: « رابع حاجة، لما تخنت كنت مكسوفة بس تقبلت جسمي و حبيته بس ده مش معناه أني مش عايزة أوصل لأفضل شكل صحي لـ جسمي، فشغالة عليه و عندي خطة للتغير، بس لحد ما أوصل للنتيجة الصح أنا حبه نفسي و أنوثتي و شايفة نفسي تمام أوي».

وتابعت: «خامس حاجة، أني بحلم أحلام ناوية بكل قوتي أحققها فـ بقيت بحط نفسي في الأماكن اللي شبه حلمي، بجذب الناس اللي بتفيدني، بحلم أحلام كبيرة بس مش و أنا قاعده علي الكنبة، و أنا بسعي في شغلي و مصدقة أني هوصل لـ أكتر ما بتمني و ده بقولوا عشان أشجعكم أنكم تتحركوا و متأجلوش اللي نفسكم فيه مهمي كانت الحاجة اللي موقفاكم، سادس حاجة، التأمل في خلق الله، غير حياتي و خلاني أكون شخص أهدي و ممتن اكتر، و حساس أكتر.. أنا حقيقي نفسي أفيدكم و أساعد اللي بيتبعوني يكونوا أحسن بأي طريقة ممكنة، وأنا بحضر حاجات جديدة اتمني أنها تكون مصدر ألهام ليكم، وحشتوني اوي».