نشرت ايثار الهاني ابنة الزميل الصحفي زياد الهاني المقيم بسجن المرناقية يوم أمس ما يلي على صفحات التواصل الإجتماعي:

'نهار الجمعة 6 نوفمبر جلسة أخرى في الهرسلة القضائية الي يتعرضلها زياد الهاني في ما يسمى بقضية بلدية قرطاج.

'القضية الكيدية الي انطلقت من وشاية مواطنة صادقة قتلك زياد الهاني كان رئيس لجنة المالية (الي هو موش صحيح) وكان مقرب من النهضة وشغله الشاغل يفوت في العقارات متع البلدية. و القضية لكلها على بعضها دار فوتت فيها البلدية في الستينات في إطار معاوضة ولم تسوّى وضعيتها قانونيا كيما برشا ناس الي نقلوهم من المعلڤة في الوقت هذاكا. المجلس البلدي في 2008 قرر تسوية الوضعية متع المواطن هذا وانطلقت رحلته من إدارة الى إدارة (من موافقة الوالي الى تقييم معهد الاحصاء للثمن حسب قانون المعاوضة الصادر في الستينات موش حسب قيمة الدار الخ الخ) الى أن وصل للعقد النهائي الي صحح عليه رئيس النيابة الخصوصية أنذاك عز الدين باش شاوش.

خلافا على أنه الملف و ما فيه إجراءات إدارية عادية وما فيه حتى قرار خذاوه الناس الي حطوهم في الحبس وأنه ما فما حتى شي في الملف يثبت أنه المتهمين خذاو فلوس والا امتيازات والا أي حاجة من عند المواطن الي تسوّات وضعيته … ما فما حتى وثيقة في الملف فيها اسم زياد الهاني كان الوشاية متع الواشية الي كلها كذب وسياسة، لا زياد الهاني مصحح على عقد لا فما مداولات متع المجلس البلدي تفيد الي زياد الهاني قرر يعطي الدار للسيد لا كانت عنده أصلا صلحيات تسمحله يعملها الحاجة هذه بما أنه كان رئيس لجنة الثقافة.

المواطن في حد ذاته الي تسوات وضعيته قال لا نعرفو زياد الهاني شخصيا لا عندي بيه علاقة وبابا كيف كيف.

وموش كان بابا الناس الي أصدر في حقهم رئيس دائرة الاتهام العاشرة بمحكمة الاستئناف سي معز بودية والمستشارين الي معاه سهيلة بن أحمد وياسين شويخة ما فما حتى حاجة في الملف تقول الي هوما خذاو رشوة والا أي نوع من الامتيازات مقابل 'التفويت' وهذه القضية الي أصدروا فيها بطاقة ايداع وقتها في حق عز الدين باش شاوش بكل قلة لياقة. كان العقد فيه اشكال اداري والواشية خايفة على ممتلكات البلدية من المفروض تمشي تشكي للمحكمة الادارية والقاضي الي نظر في الموضوع

يقول هذا من مشمولات المحكمة الإدارية وكان المحكمة الإدارية قالت هذا عقد باطل تسترجع البلدية أملاكها وتحل بحث في شكون خذى رشوة مقابل التفويت هذا أما انت عقد قانوني وساري المفعول ومستكمل إجراءاته القانونية تجي تحط الي كانوا في النيابة الخصوصية وقت الي رجع الملف للبلدية في إطار إجراء إداري موش بش يعطيو رايهم في الموضوع وفقط عز الدين باش شاوش صحح على العقد النهائي بعد ما استكمل الملف أطواره الكل هذا هبال لا قبله ولا بعده هبال

نجم ندافع كان على بابا ونقول ما فما حتى وثيقة فيها اسم بابا والا أي علاقة ليه بالموضوع من غير ما ندخل في تفاصيل القضية أما ما نجمش حرام الناس الأخرين الي مشات في العفس والمظلومة في الحبس شعملنا فيهم ؟ بابا عندو شكون يحكي عليه وصوته عالي وعز الدين باش شاوش كيف كيف ومحمد علي الهمامي وعبد اللطيف الوزرلي كيف كيف مظلومين ومشاو في العفس في قضية سياسية ما عندها حتى علاقة بمكافحة الفساد.'