بقلم حمدي حشاد (باللهجة التونسية)

السؤال هذا تكرر برشا مرات في الأيام الأخيرة، خاصة بعد ما بدا اسم الظاهرة يتكرر في الأخبار والتحاليل المناخية و السؤال كان تقريبا نفسه كل مرة، هل ظهور النينيو يعني أن تونس باش تعيش موسم أمطار قوي؟ ولا بالعكس باش ندخلوا في جفاف؟

الإجابة العلمية هي لا في الحالتين ، النينيو عمرو ما يعطي حكم مسبق على مناخ تونس ، صحيح هو من أقوى الظواهر المناخية في العالم، وينجم يبدل أنماط الطقس في قارات كاملة، لكن تأثيره على تونس يبقى غير مباشر و خارج نطاق الهيمنة المباشرة ، بلادنا في الأغلب تتأثر أكثر بحالة الغلاف الجوي فوق البحر الأبيض المتوسط وشمال الأطلسي، خاصة بمؤشرات مناخية كيما NAO تذبذب شمال الاطلسي وMO و تذبذب المتوسط و تذبذب غرب المتوسط MWEO ، وهي اللي تحدد في أغلب الأحيان مسار المنخفضات الجوية وفرص الأمطار خلال فصلي الخريف والشتاء ، و النينيو ينجم يزيد أو ينقص من احتمال نمط مناخي معين، لكنه ما يقررش وحده إذا الموسم باش يكون ممطر أو جاف يعني في منطقة امنة نسبيا من تأثيرات المباشرة لكن غير امنة ان تعلق الامر بتأثير الدومينو المناخي .

اللي تبدل فعلا في السنوات الأخيرة هو طبيعة المناخ نفسه. حتى كي تجينا كميات محترمة من الأمطار، ولات أكثر تركيزا في وقت قصير، مع فترات جفاف أطول وارتفاع في درجات الحرارة والتبخر هذاكة علاش السؤال اليوم ما عادش “قداش باش تمطر”، بل “كيفاش باش تمطر” هل أمطار متواصلة تنفع الفلاحة وتغذي السدود والمائدة المائية، أم زخات عنيفة في ساعات قليلة تنجم تسبب فيضانات ويضيع جزء كبير من مياهها؟

في تونس، أهم حاجة هي أن المناخ أصلا ولى أكثر هشاشة دراسة ( تلقاو الرابط متاعها في التعليقات ) على 16 محطة تونسية بين 1958 و2020 بينت أن العشرية 2010–2020 كانت الأدفأ خلال 62 سنة، وأن الجنوب التونسي بقي في مستويات مطر ضعيفة لا تتجاوز غالبا 200 مم سنويا، مع ارتفاع واضح في الحرارة والتبخر المحتمل و هذا يعني حتى كان جاء مطر، الخطر يبقى في سوء التوزيع، مطر قوي في أيام قليلة ثم فترات جفاف طويلة.

لهذا السبب، أي توقع لموسم الأمطار في تونس ما ينجمش يعتمد على النينيو وحدها، بل لازم يقرأ الصورة المناخية كاملة، لأن البحر الأبيض المتوسط ما يزال اللاعب الرئيسي في مناخ بلادنا.

*حمدي حشاد، مهندس بيئي