علق الإعلامي تامر أمين على تكرار وقائع الرقص غير اللائق خلال بعض حفلات التخرج التي تقام بالجامعات المصرية.

وقال أمين خلال برنامج 'أخر النهار' المذاع على قناة 'النهار': 'حالة الانفلات والتصرفات الغير لائقة اللي كان بيعملها بعض الطلبة المتخرجين في لحظات استلام شهاداتهم من جامعاتهم وأخر واقعة كنت بكلمكم عنها هذا الطالب بتاع جامعة الزقازيق اللي كان بيستلم من يومين شهادته وطالع على أنغام واحدة من أغاني المهرجانات وواقف بيرقص بطريقة غير لائقة في الحرم الجامعي وأمام ثلة من أساتذته والعمداء'.

وأضاف: 'كله واقف باللبس الجامعي الأكاديمي المحترم والواد ولا في دماغه وطالع بيشكل ولا فدماغه والاغنية لما سألت طلعت بتاعة أوكا وأورتيجا وكلامها لا يليق؛ انا قلتلكم انا مش ضد الفرحة والسعادة ولكن ضد أنك تعمل الحاجة الغلط في المكان الصح'.

وتابع: 'تعملها في قاعة تأجرها وتروحوا ترقصوا وتغنوا للصبح ولكن في الحرم الجامعي أنت في حرم الحرم؛ والحرم له مهابة واحترام؛ وزارة التعليم العالي طلعت بيان النهاردة وقالت إنها ستحقق في كل الوقائع اللي حصلت خلال الفترة اللي فاتت وكان فيها تجاوز من بعض الناس فيما يتعلق بحفلات التخرج داخل الحرم الجامعي وأنها ستحاسب سواء طلبة سواء موظفين سواء أساتذة جامعة'.

وواصل: 'ياجماعة انتوا خلطوا بين التخرج في الجامعة واستلام الشهادة وبين البروم؛ البروم اللي بتشوفوه في أوروبا وأمريكا بيكون برة الجامعة؛ دول الطلبة بيروحوا يحجزوا صالة ولا قاعة والا نادي ويروحوا يرقصوا فيها للصبح احنا شبابنا قالك نوفر القرشينات ونرقص جوه الجامعة؛ الكلام ده مينفعش'.

واختتم: 'نداء من الوزارة ومني أهو إلى كل الأساتذة والعمداء والمدرسين وأنت واقف وبتسلم الشهادات لو لقيت طالب بيرقص والمزيكا دي شغالة انسحب فورا ومتطلعش إلا لما الأمور يعود ليها الضبط والنظام لأن انت جزء من هذه الصورة مينفعش المزيكا دي تشتغل والواد واقف بيرقص ويشكل وأنت واقف تشارك في المهزلة دي أول ما تلاقوا مزيكا مش تمام والولد مش مدي المنصة والمكان احترامه اخرج وشوف بقي مين يا طالب اللي هيسلمك شهادتك'.