أكد الإعلامي مصطفى بكري، أنه يجب على الوزراء والمحافظين العمل بكل جد خلال الفترة المقبلة، مشيرا إلى أنه سيتم تقييمهم بعد 6 أشهر.

وقال بكري خلال برنامج 'حقائق وأسرار' المذاع على قناة 'صدى البلد': 'عندنا حد عايز البلد دي تقف على رجليها ولكن الحد دا الإيد الواحدة مش هتسقف ياجماعة مينفعش، وزير قاعد في بيته أو شايف انحراف وساكت مينفعش، محافظ يقفل على نفسه في المكتب'.

وأضاف: 'هي 6 شهور والريس قالهم كده أنا هقيمكم بعد 6 شهور، والسيد رئيس الوزراء قال الكلام ده التقييم هيبقى بشكل دوري ومستمر وهيتقدم لمجلس النواب ودا كويس أوي أن يبقي في شراكة بين الحكومة ومجلس النواب، أنا جهة رقابية لازم أراقب على الحكومة والأسعار'.

وتابع: 'لما بنتكلم يا جماعة والله ما حد فينا بيتكلم مجاملة لفلان أو علان ولما بنعارض حاجة معينة بنعارضها لوجه الله ولوجه الوطن، ولما بنأيد إحنا خايفين على بلدنا، إحنا شايفين الأعداء موجودين جوانا وبداخلنا وفي ناس بتشوف الفساد وتتفرج عليه وتشوف التكاسل في الأداء وتتفرج عليه، البلد دي بلد الوطنيين وبس مش بلد حد يحمي انحراف، البلد دي بلد المصريين الوطنيين الحقيقيين اللي مكويين بمشاكل الناس'.

وأوضح: 'أنا لسه راجع النهاردة الصبح من قنا من بلدنا الناس جات تشتكيلي الأسعار هنعمل إيه فيها وانتوا قاعدين ساكتين والله ما ساكتين والله مكويين وتعبانين، كلنا نتألم لأن إحنا ولاد الطبقة الفقيرة، ولاد الناس الغلابة كونك بقيت في مكانة أو منصب بس مش هننسي أهلنا ولا حياتنا الاجتماعية'.

وذكر: 'فرق كبير جدا وأنت بتدافع عن أهلك وعن بلدك وعن ناسك وبين أنك تكون خنجر في ظهر وطنك، بعض الناس يقولك الحق الغعلام بيطبل، لأ إحنا مبنطبلش لو طبلنا نفقد مصداقياتنا قبل أي حد ولكن إحنا خايفين على البلد أحيانا بتسكت وتتألم وتتوجع بس أنت خايف على بلدك خايف على الوطن ده'.

واختتم: 'الوطن ده لو حصله حاجة زي بلاد تانية والله ما هنسامح نفسنا ليوم الدين، في ناس طلعت في 25 يناير وقالت بعد تلات شهور فينك يا أبو علاء، الدكتور طارق شوقي اللي اتبهدل واتشتم من يومين هاشتاج فينك يا دكتور طارق دلوقتي افتكرت الدكتور طارق شوقي؟ دلوقتي افتكرت أبو علاء؟'.