ننقل في ما يلي ما روته آرام الهاني عبر تدوينة نشرتها على صفحة 'الحرية لزياد الهاني':

'في نهار كيما اليوم، وصلت فيه السخانة لـ50 درجة في المرناقية. مشيت أنا ومّا وأختي آلاء باش نزورو با، وبالطبيعة نحنا نعيشو من جمعة لجمعة نستناو نهار الزيارة، وما فما حتى سخانة تنجم تمنعنا.

با عودنا ديما بكلمة 'لاباس'. عمرو ما يتشكى من الوضعية اللي يعيش فيها في الحبس، وديما يعطي كل صاحب حق حقو ويحكي على المعاملة الباهية من طرف الأعوان داخل السجن.

أما كيف يجيك بوك، وعمرو 62 سنة، ويقلك: 'جيبولي فوتة نفرشها في القاع باش نرقد فوقها، خاطر الجراية تسخن برشة'، كيفاش تحبنا نسكتو؟ كيفاش تحبنا ما نتقهروش؟

وللهوايش الي باش يقولو: 'هذاكا الحبس'، و'اللي عمل يخلص'… من توا نتمنالكم تذوقو نهار واحد من اللي يعيشوه هوما الداخل، ومن اللي تعيشو عايلاتهم البرة.

وكيف نجي نخمم السلطة تحبهم في الحبس موش باش تسكتهم وحدهم، أما باش تعاقب حتى عايلاتهم. باش تولّي حياتك الكل تتمحور حول زيارة، حول طريق طويل، حول قفة، حول محكمة. باش تستهلكك نفسياً وجسدياً حتى تولّي ما عادش عندك طاقة لا للغضب، لا للنضال، لا حتى للحياة العادية. لكن باش يكون في علمكم الغضب يتزاد مع كل زيارة و كل مناسبة حرمتونا نتلمو فيها و مع كل نطفة ظلم سلطوها علينا و على غيرنا.

رانا رافضين التعود ، رافضين نتعودو على الظلم، نتعودو على الحبس، نتعودو على غياب الناس اللي نحبّوهم، ونتعودو على فكرة أنو مواطن ينجم يدخل للحبس خاطر رأي ولا موقف. اما للاسف السلطة هاذي نجحت في حاجة خطيرة برشة: خلات برشة عباد تشوف الظلم كل يوم وما عادش تستغربو.

في الآخر، نحنا نعيشو المعاناة ثلاث ساعات ونرجعو للكليماتيزورات. أما هوما يبقاو غادي. ومع هذا، على الأقل هوما في الحبس وهم رافعين روسهم، مقتنعين بمواقفهم، ودفعو ثمن أفكارهم ومبادئهم.

أما أحنا شنوة باش نقولو لولادنا نهار آخر؟ أنو شفنا الظلم وسكتنا؟ أنو تعودنا بيه؟ أنو قبلنا بيه؟'.