كشف الفنان أحمد فهمى عن تعرضه لأزمة صحية شديدة نتج عنها إجراء عملية قلب مفتوح وهو الأمر الذى تسبب فى تغيير نظرته للحياة بشكل كبير. 

وقال أحمد فهمى فى برنامج كلام نواعم : “بحب اهتم بجسمي أوي وأروح الجيم وأكل كويس، في 2016 كنت أول مرة اشتغل مسلسل لرمضان وأخلص قبل رمضان عادة بنخلص تصوير في رمضان، خلصت قبله بكام يوم وأنا بحب الحلويات أوي ورمضان بقى كنافة وقطايف لقيت نفسي بزيد على الميزان قلت أروح للدكتور عشان أظبط الأكل، وهو بيكشف عليا عمل ريأكشن كده حاول ميبينوش بس أنا فهمت وطلب مني تحاليل”. 

وأوضح أحمد فهمي : عملت التحاليل رجعت له قالي أنت عندك حاجة في القلب قلت له إزاي المفروض أحس بأعراض، قالي محتاجين نكشف، كشفت في حاجة اسمها الصمام الميترالي عندي فيه قطع بسبب العصبية، سافرت وعملت عملية قلب مفتوح في إنجلترا فجأة في اللحظة دي شفت الحياة بمنظور مختلف تماما الدكتور وهو معايا دخلنا أوضة العمليات عشان يشرحلي قالي السرير دا أنت ممكن بعد ساعتين تقوم وممكن لأ بيتكلم عادي أنا مأخدتش الكلمة أنها حاجة وحشة وأخدتها بطريقة إيجابية بس من اللحظة دي بقيت بشوف الحياة بمنظور مخالف وأن الواحد بيلهث على أشياء ممكن تكون مش مهمة أوي. 

وشارك أحمد فهمى مؤخرا فى مسلسل “نقطة سودة” الذى انتهى عرضه منذ فترة قصيرة وتدور أحداث مسلسل “نقطة سودة” حول عائلة السيوفي وأفرادها والعلاقات المضطربة بين أفرادها، وتتكون عائلة السيوفي في الأساس من مختار السيوفي “أحمد بدير'، الذي أسس شركة مع شقيقه الراحل فريد، ومختار متزوج من ناهد رشدي ولديهما ابن يدعى علي “أحمد مجدي”، وهو شاب مسالم ولكنه غير مسئول، أما فريد فكان متزوجًا من سعاد “وفاء عامر” ولديهما ابن يدعى عمر “أحمد فهمي”، ومنال “ناهد السباعي” وابنة ثالثة تدعى صفا.