على مدار أكثر من 4 أشهر عكف 11 طالباً بقسم «الهندسة الطبية والحيوية» بكلية الهندسة بجامعة المنصورة، على تنفيذ بدلة ذكية «Smart Suit» مخصّصة لكبار السن، لمتابعة حالتهم الصحية ضمن مشروع تخرّجهم في الترم الأول بنظام الساعات المعتمدة.

يحكي عمار محمد عبدالمنجي، أحد طلاب المشروع، عن الفكرة، لـ«الوطن»، قائلاً: «الفكرة جات لنا بعد ما سمعنا عن حد كبير في السن نزل في الشارع لوحده، وكان عنده زهايمر ومريض ضغط وقلب وتاه، وقعد حوالي أسبوع على ما عرفوا يوصلوا له فكانت من هنا الفكرة، فتناقشت في الفكرة مع الدكتور محمد صبري سرايا، والمهندسة نادين حسام، والمهندسة مريم العزاوي، وزملائي، وبدأنا نطور بدلة مجرد ما المريض يلبسها نقدر نتابع المؤشرات الحيوية بتاعته عن بُعد زي الضغط وضربات القلب ونسبة الأكسجين في الدم، والأهم من ده كله نقدر نعرف مكانه».

تم تنفيذ فكرة المشروع على مدار الترم الأول، بحسب «عبدالمنجي»: «البدلة الذكية هتكون مُخصصة لكبار السن لمتابعة حالتهم الصحية عن طريق سنسورات زي درجة الحرارة، ونسبة الأكسجين في الدم، ونبضات القلب، وكمان فيه GPS عشان يقدر يحدّد مكانهم، كل ده بيتعرض عن طريق website للمشروع، ونفذّنا الفكرة على مدار الترم الأول».