نشر مجدي الكرباعي، الناشط في المجتمع المدني بايطاليا بكل أسف ما يلي:

'إلى متى تبقى الأم، بعد ما تفقد ولدها في الغربة، تتوسّل باش يرجّعولها جثمانه وتودّعه بكرامة؟

دولة بمؤسساتها، وخصوصاً وزارة الخارجية، والسفارات والقنصليات، المفروض تكون سند للمواطن وعائلته في أصعب لحظات حياتهم. لكن عوض ما تقوم بدورها الإنساني، نلقاوها غايبة عن واجبها، زعام في تحرير التقارير الأمنية حول المواطنين ومراقبتهم.

يمكن برشة يستغربوا من موقفي، لكن أنا مع إلغائها إذا كانت عاجزة حتى عن القيام بأبسط واجباتها الإنسانية. وجودها من عدمه ما عادش يفرّق، بل يمكن غيابها أرحم من حضور شكلي بلا فائدة.

أمّهات موجوعات، قلوبهنّ معلّقة بين الأمل والوجيعة، يناشدن رئيس الدولة باش يتدخّل ويرجّع أبناءهنّ، سواء كانوا مفقودين أو متوفّين.

يا للعار أن يصل المواطن إلى مرحلة يتوسّل فيها الدولة باش يتمتّع بحقّ من أبسط حقوقه: أن يُدفن ابنه في أرضه، وأن تودّعه أمّه بكرامة.

الدولة اللي ما تنجمش تحفظ كرامة مواطنيها حتى بعد الموت، شنوّة بقى من معنى وجودها؟'.