كشف الفنان حسن الرداد عن مدى رضاه عن مسلسله الأخير “عقبال عندكوا”، الذى عرض فى النصف الأول من رمضان الحالي. 

وأعرب حسن الرداد، في لقاء مع ET بالعربي، عن رضاه التام قائلا: 'أنا راضٍ عن مسلسل 'عقبال عندكوا' أكتر من أي مسلسلات عملتها، من أكتر وأجمل مواقع التصوير اللي انبسطت فيها، انبسطت مع المخرج علاء إسماعيل مخرج مهم جدا وأعتقد هيعمل نجاحات كتيرة الفترة اللي جاية، أحمد والي وعلاء حسن المؤلفين بحب أشتغل معاهم هايلين والكوميديا لذيذة ومحترمة، وإيمي أحلى حاجة رجعنا نشتغل مع بعض بعد حوالي 7 سنين كانت متألقة ولذيذة'. 

أما عن تعليقات جمهور السوشيال ميديا، فقال حسن الرداد: 'بفهم إن في ناس بتنقد بشكل علمي، وبفهم إن في ناس حقودة وغيرانة وناس بتبقى عايزة تمثل ومعرفتش، لازم الواحد يبقى عنده فطنة ويفهم إيه الإيجابيات والسلبيات، أي فنان بيعمل عمل هو عايز يقدم أفضل شيء عشان يبسط الناس وفي عوامل كتيرة جدا في العمل بتبقى خارجة عن إرادة الممثل في إخراج وإنتاج'.

وأوضح: 'السوشيال ميديا أنا لا بقرأ فيها الكلام الإيجابي ولا السلبي، بس ببقى عارف إيه اللي بيحصل لأن الناس اللي بتكتب تعليقات سلبية وارد يبقى مش عاجبها المسلسل ووارد تبقى لجان لأن دلوقتي بقى فيه بيزنس اسمه اللجان الإلكترونية، دا كله في عالم السوشيال ميديا لو قفلته وروحت للحياة الطبيعية وتقابل الناس بتعرف إيه اللي عاجب الناس'.

بينما رد حسن على الآراء التى تقول إنه مناسب أكثر للأفلام الرومانسية قائلا: 'أنا بشوف من وأنا في معهد فنون مسرحية إن دا فخ أنا مكنتش عايز أقع فيه إني بتقن الأدوار الرومانسية أكتر، أنا نجحت في 'آدم وجميلة' وكان ممكن أبقى رومانسي الجيل، كمية العروض اللي كانت بتجيلي في مصر وبرا مصر رومانسية وكنت برفضها، لما عملت كوميدي وفيلم 'زنقة ستات' نجح جدا كل اللي بيتعرض كوميدي، لازم الممثل يكون عنده وعي إنه قادر يقدم حاجات مختلفة'.