أكد علاء فاروق، وزير الزراعة واستصلاح الأراضي، أن الزراعات في محافظة الإسكندرية لم تتأثر بشكل كبير جراء الأمطار والسيول الأخيرة، مشيرا إلى أن الوزارة تدخلت بشكل سريع لتصريف المياه المتراكمة عبر جهاز تحسين الأراضي والزراعة الآلية.

وقال فاروق، في مداخلة هاتفية مع برنامج 'أحداث الساعة' المذاع على قناة 'إكسترا نيوز': 'اللي بنرصده بيكون من خلال الشكاوى اللي بتجينا، والحمد لله الزراعات في منطقة إسكندرية إحنا بنحاول نغطي أي حاجة موجودة فيها من إزاحة مياه عن طريق جهاز تحسين الأراضي أو الزراعة الآلية، وموجودين مع المزارعين على مستوى المحافظات المجاورة'.

وأضاف: 'حدث بعض التكدس المائي في بعض الترع والمصارف، وبالتالي كان مهم جدا إننا نتدخل بالمعدات الخاصة بوزارة الزراعة والأجهزة المعنية عشان نفتح القنوات الخاصة بتصريف المياه على مستوى محافظة الإسكندرية، والحمد لله الجهاز عنده ما يكفي من معدات وما يكفي من عمالة بشرية إنه يقدر يكون طوق نجاة سريع للمزارعين'.

وعن مدى التأثير على محصول القمح، أوضح الوزير: 'خسارة الزراعات مش كبيرة، وطبعًا كان الخوف كله على موسم القمح، بس الحمد لله إحنا جنينا تقريبا أكثر من 95% من المساحات المزروعة بالقمح، وما فيش تأثر في المحاصيل التانية، واللي رصدناه فعليا هو تكدس المياه في بعض القنوات والترع، وتم تصريفها والتعامل معاها فورا في اليوم التالي مباشرة'.

وتابع: 'إحنا موجودين من خلال أجهزة الوزارة على مدار اليوم، وأي مزارع أو فلاح أو مستثمر تأثر أو عنده أي مشكلة خاصة بتصريف المياه، إحنا جاهزين نتعامل مع هذه الأحداث، والمعدات الزراعية انتهت بنسبة 99% من عمليات التعامل مع الأضرار، والشكاوى اللي جات النهاردة تعد على الأصابع'.

واختتم: 'قنوات الاتصال مع الوزارة متعددة، يا إما بيتواصل مع مديرية الزراعة في المحافظة، أو مباشرة مع الوزارة من خلال البوابة الحكومية أو بوابة الوزارة، أو بيتواصل معانا شخصيًا ومع المسؤولين من خلال الموبايل، وإحنا موبايلنا مفتوح 24 ساعة، واعتقد إن رقم وزير الزراعة مع 99% من مزارعي مصر وفي تنسيق كامل مع وزارة الري لحل أي مشكلات'.