أكد الإعلامي حسام الغمري أن جماعة الإخوان الإرهابية اعتادت على الغدر بالقيادات المصرية منذ إنشائها.

وقال الغمري في مداخلة مع برنامج 'رؤية' المذاع على قناة 'تن': 'القناة الـ 14 المقربة مع نتنياهو وصفت السلام مع مصر بصلح الحديبية وشوفنا الصورة اللي نشرتها جيروزاليم بوست، معروف أن فتح مكة جاء بعد صلح الحديبية ودا اللي يقصدوه'.

وأضاف: 'مصر دولة سلام ومتمسكة بالسلام والرئيس قال احنا دولة عايشين جوة حدودنا وعايزين نبني ورغم كل ده والتحريض الإعلامي العبري في الوقت ده أي مواطن شريف المفروض أننا نتوحد ونصطف خلف قياداتنا ومع ذلك بنلاقي واحد زي جمال سلطان كاتب إنه ياحرام كان نفسه يصطف مع القيادة طيب أيه اللي مانعك؟ قال بينا وبينها بحور من انعدام الثقة وموضحش بيجمع مين مع مين بصيغة الجمع ده'.

وتابع: 'هل يظن أنه بيجمع باسم الشعب؟ مظنش وبحكم سنه وعمره لا أظن أنه بيتكلم باسم الشعب طيب بيتكلم باسم من أطلق عليهم الغرب مصطلح الإسلاميين؟ وحقيقي مفيش حاجة في تاريخنا اسمها إسلاميين ولا تيار إسلام سياسي إحنا من القرن الأول الهجري نعرف حاجتين مسلمين أو خوارج'.

وواصل: 'لو عايز تتكلم عن الغدر اللي بصحيح يا جمال ياسلطان أرجع لتاريخكم بقي لتاريخ جماعة مدرس الخط اللي كان بيتلقي تمويلات من الملك فاروق دا هو اللي اختارلهم الهضيبي مرشدا عاما بعد حسن البنا والتقي مع الملك فاروق وقال انه لقاء كريم مع ملك كريم وتاني يوم غدر بيه'.

وأكمل: 'نفس الغدر اللي عملوه مع الرئيس جمال عبد الناصر بخلاف محاولتهم عرقلة اتفاقية الجلاء مع الإنجليز ومحاولة اغتياله في المنشية، طيب أثناء وجود الجيش المصري في اليمن والبي بي سي نشرت التوجيه اللي الإخوان خدوه من بريطانيا وأصدروا بيان بتكفير الجيش المصري'.

واختتم: 'بعد هزيمة بريطانيا في العدوان الثلاثي أمر رئيس الوزراء البريطاني وزير خارجيته بالانتقام من الرئيس عبد الناصر في اليمن وطبعا الإخوان بينكروا وبيقولوا البريطانيين استغلوا اسمنا من ورانا ولكن وجودهم النهاردة في بريطانيا وقنواتهم اللي بتبث من هناك تؤكد التحالف الاستراتيجي بينهم وبين بريطانيا'.