نصائح من ذهب يقدمها المهندس البيئي مساء اليوم الاربعاء 15 جويلية 2026 بخصوص حرارة الطقس لا في وقت الذروة من العاشرة صباحا الى الخامسة بعد الظهر فحسب بل ليلا خاصة إذا سجل مقياس الحرارة فوق 30 درجة:

'شوفوا توة في تليفوناتكم ولا في تطبيقات الطقس قداش تسجل السخانة في هاللحظة؟ إذا لقيتوها فوق 35 درجة، راهو هذا موش مجرد نهار سخون، هذا مؤشر على وضعية حرارية مقلقة أكثر من العادة.

المشكل موش كان في حرارة النهار الأخطر هو الليالي اللي ما عادش تبرد وقت اللي تبقى الحرارة فوق 30 درجة حتى بعد غروب الشمس، الجسم ما يلقاش الفرصة باش يرتاح ويبرد روحو ، هوني نوليو نحكيو على الليالي الاستوائية Tropical Nights ، واللي تنجم تسبب إجهاد حراري متواصل، نوم أقل جودة، تعب كبير في الصباح، وارتفاع المخاطر الصحية خاصة عند الفئات الهشة.

انتبهوا بالخصوص للرضع، للأطفال الصغار، ولكبار السن ما تخليوهمش في غرف مسكرة ولا في بلايص سخانة، وفرولهم التهوية والهواء البارد قدر الإمكان، واعطيوهم الماء بانتظام حتى كان ما طلبوش كبار السن ساعات ما يحسوش بالعطش كيف العادة، والرضيع ما ينجمش يعبر، لذلك المراقبة مهمة برشا.

إذا ظهرت علامات كيف التعب الشديد، الدوخة، الصداع، الغثيان، التعرق المفرط أو العكس جفاف الجلد، لازم يتنقل الشخص لمكان أبرد ويتعمل اللازم بسرعة…'.

*حمدي حشاد