بعد أن نشر النائب وسام الشهيدي تدوينة عما عاينه في استعجالي مستشفى عمومي عل اثر ازمة انتابته على مستوى الكلى، رد الد. وجيه ذكار، رئيس جمعية الأطباء الشبان بما يلي:

'يعني هذا السيد النائب يعمل في ميزانية الصحة كل عام ويعرف ديون المستشفيات وأزمة الصناديق الإجتماعية. ومن بعد يجي مستغرب كيفاش مافماش دواء، واحنا نبعثوا في المواطنين يشريوا فيه من برة بالفلوس؟'

في ما يلي تذكير بما نشره السيد النائب:

'البارح جاني كريز متاع كلاوي للي معادش انجم بالوجايع ايا شديت روحي وقلت لازم نمشي الاستعجالي الوجيعة ماشية وتقوى…

خرجت من الدار مع ماضي ثلاثة ونص متاع الصباج وقلت أقرب حاجة توا استعجالي الياسمينات ماعندي حتي حل اخر اعطيني نعمل زريقة تنحيلي الوجيعة اللي نحس فيها والله لا توريها لحد…

دخلت للاستعجالي وقيدت وجاتني الممرضة وقاستلي التونسيون ودقات القلب وحكيتلها على الوجايع وقتللي استنا شوية للي تجي الطبيبة….

ايا استنيت كى الناس الكل، ونص ساعة ولا جات لا طبيبة ولا شيء، سهلت عون الحراسة قتلو ياخي الطبيبة وين، حاصيلو حكالي حكاية حولة لا علينا فيها اما علي اساس في البلوك الاخر واهي جاية، مدخلتش المخي لحكاية، ومشيت وقفت بحذا الغرفة اللي يرتاحو فيها الاطباء، بعد درجين اخرين خرجة الطبيبة من الغرفة يعني لاهي في بلوك اخر ولا شيء وعيناها بالنوم…

باهي موش مشكل ترتاح، اما انت تخدم يا مدام في استعجالي يعني كل حد يجيكم راهو موجوع ولازم التدخل الطبي بسرعة، موش جاين تخدمو وانتم ناقصين نوم…

الحاصل احكيت معاها علي الحالة متاعي والكريز متاع الكلوة كتبتلي ورقة وقتللي برا اشري الدواء هذا…

قعدت نخزرلها توا معقول هذا، تي انا يعلم ربي كيفاش خلطت وانا نسوق من الوجايع، وتزيد تبعثني باش نشري دواء باش يعلقوه في السيرو، قلتلها دكتور عادي لمريض تبعثوه يشري الدواء، قتللي هذاكا هوا اش باش نعملك، معندناش دواء، وليت خرجت كي الناس الملاح ومشيت نفركس علي فارماسي متاع ليل وخذيت الدواء، غير اعطيني لوجيعة تتنحى…

ايا صبولي الدواء ولكن لا تنخات وجيعة ولا شيء قلت لازم شوية وقت، وخذيت الدواء اللي عطاتهولي باش نشريه نشربو وروحت…

لكن مللي روحت وانا نتوجع وشربت الدوايات الكل انواع وأشكال باش تتنحى لوجيعة وشيء…

مع الأربعة متاع العشية وانا اندادي بالوجيعة، طلبت خويا قتلو ايجا هزني لطبيب والا كلينيك والا اي بلاصة الفايدة نرتاح من الوجايع، جاني يكثر خيرو ومشينا لطبيب يعرفو هوا الدكتور ضياء وقسما بالله مازلت نحكيلو عمللي زريقة تقول كنت نكذب وحكيتلو على الدواء اللي عملتو في الاستعجالي والدواء اللى وصفتهولي الطبيبة وخذيتو، هوا بيدو قعد مستغرب…

في الاخر نحب نقول يا دكاترة الطب العمومي راهم الناس الزواولة اللي تجيكم للاستعجالي راهم توانسة ومن حقهم الرعاية كاملة والاحترام، ماهمش بقر تتعاملو معاهم والا خاطر لا عندهم لا معارف ولا فلوس….

انا هاني شفت بعيني حتي الدواء اللى وصفهولي في الاستعجالي ماعندو مايصلح، علقليلة كي تمرمدو الناس اوصفولهم دواء يرتحهم موش يزيد على مابيهم…

وكان موش عاجبتكم خدمة الناس سيبوها فما طبة متخرجين من سنوات وملقاوش بلاصة…

طبة اخر زمان حشى اللي ما يستهلش….

والله لا عاد فاهمين هالبلاد منين باش تتصلح…

وعلى فكرة في الاستعجالي بين التقيد والدواء تكلفت خمسين دينار وما صار شيء، والطبيب الخاص فازيتا وزوز زرارق وتصرف راقي ب 70د….

سلام…'.