"دردشة قبيل حلول ..’ شهر الخير’..!!" يكتبها الشاعر الأزهر الضاوي "قبل الصيام"

'ماتصوموش يا 'أهالينا'..

ماتصوموش قَبْل'الصّبّان'..؟؟

كيف يصبولنا 'شهارينا'..

ساعتها يبدى 'الصومان'..؟!!

'في بلادي بلاد الغبينة..

بلاد 'الهزان والنفضان '..

صارت أقصى أمانينا..

كينجح 'سيدي رمضان'..؟!!

و'الحاكم' يوفر لينا..

'زيتو' الغايب توة زمان..

و'عظام دجاج الماكينة'..

الغالي على الشعب الجيعان..

والذكريات الحزينة..

على 'لحم البقري والضان'؟!!..

..حسرة على أيام 'الكوزينة'..

منين كان الواحد مطمان..

خيرَه مكدس مالي عينه..

وشهريته من غير قصّان….؟!!

عنده 'العولة' في التركينة ..

متبذخ كيف السلطان..!!!

..دوري يا دنيتنا بينا..

واش صار الواحد واش كان..؟؟

'زوز فرنك' زلطوا من يدينا..

خلوا مولاهم حيران..؟؟

وانت جاي تحشم فينا..

لواه هكة.. 'سيدي رمضان'..؟؟

شطَر العام واحنا صايمينه..

بطبيعتنا.. لينا زمان ..!!

.. بركة.. 'ربي يرفق بينا'..

ونعدّو ل'بر الأمان'..

واللي 'تزقزق مصارينه'..

'يقوّي قلبَه بالايمان '..؟؟!!..

ما تصوموش يا 'أهالينا'..

ماتصوموش قبل 'الصبان'..؟؟

'قفصة.. في يوم ثلاثينا.. اخر نهار في شعبان'..!!'.