اخبار مصر
موقع كل يوم -خط أحمر
نشر بتاريخ: ١٧ أيار ٢٠٢٥
قال حازم توفيق، الإعلامي والإستشاري الأسري، إن الغيرة عند الست ممكن توصل بيها لحد القتل، سواء لشريك حياتها أو حتى لصديقتها اللي بتغير منها.
وأضاف خلال مشاركته في برنامج 'خط أحمر' الذي يقدمه الإعلامي محمد موسى على قناة الحدث اليوم، إن في دراسة أمريكية اتعملت سنة 1998 ونشرت في مجلة الأكاديمية الأمريكية للطب النفسي، أظهرت إن 13 من كل 20 شخص مستعدين إنهم يلجأوا للعنف، وربما القتل، بسبب الغيرة تجاه شركائهم أو أصدقائهم.
وأكد حازم إن الغيرة دايماً بتكون نابعة من إحساس بالنقص أو عدم ثقة بالنفس. يعني لو الست أو الراجل واثق من نفسه، ما عمره هيغير من حد أنجح منه أو أجمل منه، لكنه أشار إن الغيرة بتظهر خاصة لما الست تشوف واحدة أجمل أو أنجح منها، وتبدأ تقارن نفسها بيها، وده بيخليها تتحسس من نفسها ومن نجاح غيرها.
وأوضح كمان إن الغيرة مش بس موجودة في المجتمع العربي، لكنها بتاخد أشكال مختلفة حسب الثقافة والبيئة. وقال إن الغيرة الصامتة أو الخفية هي أخطر أنواع الغيرة لأنها بتسبب صراعات نفسية عميقة، بس مش بتظهر للعامة.
وختم حديثه مؤكداً إن الغيرة المفرطة خطر كبير ممكن يهدد العلاقات، وإنه لازم نشتغل على بناء الثقة بالنفس عشان نقدر نقلل من ظاهرة الغيرة دي، اللي للأسف ممكن توصل لأفعال مأساوية.
