«كان نفسي في دعوة».. تفاصيل تكريم أحمد عز بمهرجان القاهرة السينمائي ورسالة عاجلة لـ الزعيم عادل إمام

أهدى الفنان أحمد عز الجائزة التي حصل عليها من قبل مهرجان القاهرة السينمائي الدولي في دورته الـ 45 للزعيم عادل إمام، وذلك ضمن فعاليات المهرجان داخل دار الأوبرا المصرية.

وعبر أحمد عز عن سعادته بشأن تكريمه قائلا: «من 24 سنة خيروني بين أني أكمل في شغلي أو أعمل بطولة أول فيلم، واخترت على غير رغبة أهلي إني أشتغل في السينما، وكان نفسي أحضر المهرجان ويجيلي دعوة مكتوب عليها الفنان أحمد عز، عشان أقول لأمي وأبويا إن جالي دعوة».

وتابع: «رحت المهرجان أول مرة عشان أتصور ومحدش عرفني وعديت على الكاميرات ومحدش بصلي، وقلت مش مشكلة، وكان نفسي أقعد عشان أبويا وأمي يشوفوني في البيت عشان يبقوا فخورين بيا، وبتاع الأمن وأنا داخل قالي حضرتك قاعد فوق خالص، وفعلًا قعدت فوق وروحت البيت وأنا متضايق جدًا، وأمي يوميها قالتلي ربنا ينولك مرادك».

وأكمل أحمد عز حديثه: «وتلف الأيام، وأقف على خشبة دار الأوبر العريقة وأتكرم بجائزة اسم صاحبتها لوحده جائزة ويمنحني الجائزة معالي وزير الثقافة والنجم الأستاذ نجم النجوم اللي مجاش زيه، بس للأسف كل دا بييجي وأبويا وأمي مش موجودين، وأكيد لو كانوا موجودين كانوا هيبقوا فخورين بيا».

واستكمل: «والجائزة دي مش بتاعتي لوحدي، دي بتاعة كل واحد علمني حاجة، وأنا أعتبر الجائزة العظيمة هي حافز للي جاي، وأنا بحس لحد النهارده إني لسه معملتش أي حاجة، وأنا فاكر أول مرة كنت قاعد مع ساندرا نشأت وهي بتقولي هنقدمك للناس إزاي، ويا رب كل زملائي وكل أصحابي يقفوا مكاني ويتكرموا تكريمات أحسن مني بكتير، وأهدي الجائزة للزعيم عادل إمام».

وتعد أن أخر أعمال أحمد عز هو فيلم «ولاد رزق 3»، وشارك في بطولته مجموعة كبيرة من نجوم الفن أبرزهم: «أحمد عز، عمرو يوسف، وأحمد الفيشاوي، وكريم قاسم، ومحمد لطفي، وآسر ياسين، وسيد رجب، ونسرين أمين، ومحمد ممدوح، وأحمد داود، وعلي صبحي، ومن أبرز ضيوف الشرف الملاكم العالمي تايسون فيوري، وكريم عبد العزيز» والعمل من تأليف صلاح الجهيني، وإخراج طارق العريان.