أحمد موسى: فيديو الإسكان يكشف حقيقة أرض الزمالك في أكتوبر

أكد الإعلامي أحمد موسى أن وزارة الإسكان نشرت مقطع مصور يشير إلى عدم قيام نادي الزمالك بأي انشاءات تذكر أرض النادي الموجودة في حدائق أكتوبر والتي صدر قرار بسحبها أمس.

وقال موسى خلال برنامج 'على مسؤوليتي' المذاع على قناة 'صدى البلد': 'امبارح إحنا عرضنا رأي وزارة الإسكان ورأي نادي الزمالك كاملًا امبارح بالظبط عرضنا 40 دقيقة، أو ربما 43 دقيقة بالضبط، عن نادي الزمالك وجهة نظرهم كلها، والدنيا كلها شافتها، وما كانش فيه أي مشكلة'.

وأضاف: 'امبارح جالنا فيديو، وإحنا كمان كنا مصورين الشغل الموجود في نادي الزمالك في حدائق أكتوبر، وعرضناه وزارة الإسكان دعمت البيان بتاعها اللي قلته لحضراتكم بفيديو الفيديو بتاعهم بيورينا زي ما هم قالوا الأرض بس هل تاريخ الفيديو ده إمتى؟ ما نعرفش، لأنه مش محدد'.

وتابع: 'لكن هم مصورين بالدرون، وبيورينا أرض نادي الزمالك في حدائق أكتوبر، إنها ما فيهاش حاجة يعني ولا شيء، مجرد بوابة يمكن، أو مبنى صغير ما فيش مباني، مجرد شوية أسمنت وده طبعًا طبقًا لوزارة الإسكان الفيديو صدر مع البيان امبارح بالليل الساعة 10 إلا ربع، وإحنا كنا خلصنا الهوا الساعة 9 ونص'.

وواصل: 'وزارة الإسكان بتقول ما فيش حاجة، ولا 1%، ولا ربع %، ولا أي شيء طب، هل ده تم تصويره إمتى؟ الله أعلم لأن الفيديو اللي إحنا عرضناه امبارح كان مختلف عن ده'.

وأوضح: 'دي طبعًا أرض نادي الزمالك، اللي هي أرض مساحتها هائلة – 130 فدان – في أحسن منطقة في أكتوبر، مناطق سكنية ومحاور مرورية وقريبة من مدينة زويل'.

وأكمل: 'وزارة الإسكان، والمهندس شريف الشربيني، طلعوا البيان امبارح بالتفاصيل، وقالوا إنهم ادو الزمالك كل حاجة، خلصوا المهل كلها، وادوله كل التسهيلات، لكن الزمالك ما التزمش'.

وذكر: 'امبارح بالليل كان معانا الدكتور حسام في مداخلة، وحصل لقاء مع المهندس شريف الشربيني، وزير الإسكان وعندهم جلسة بكرة كمان نادي الزمالك عنده جلسة مع وزير الإسكان. إيه اللي هيتم؟'.

واختتم: 'نادي الزمالك وجمهوره بيطلبوا طلب واحد بس رجعوا الأرض وادونا مهلة أخيرة ولو محصلش خلي بالك، الزمالك محتاج 9 مليار جنيه. 9 مليار عشان يبني المشروع ده كله هل الفلوس دي موجودة؟ الله أعلم'.