"ربطته علشان يغطس ميطلعش تاني".. كيف تخلص الصياد من صديقه في المحلة؟

الغربية - مروة شاهين:

اعترف صياد متهم بقتل صديقه بالمحلة الكبرى وإلقاء جثته بمياه 'مصرف سندسيس' بجوار قرية البنوان، بجريمته أمام نيابة مركز المحلة بسبب خلافات بينهما على أماكن الصيد.

وقال المتهم خلال اعترافاته أمام النيابة :'بدأت الخلافات لما حاول ياخد جزء من المكان المخصص لي بالصيد ويصطاد منه واتخنقت معاه لما لقيته فرش الشبك قبل الواقعة بيومين وسبتله الترعة ومشيت وجه ورايا عشان يصلح الموضوع لكن رفض التخلي عن الجزء الخاص بي من الترعة'.

واستكمل المتهم أمام جهات التحقيق:'اضايقت منه وحسيت إنه بياكل حقي وكلمته في التليفون ليلة الواقعة وقلتله تعالي نتقابل عند الترعة عشان نتفاهم إحنا بردوا أصحاب ووكلين عيش وملح مع بعض وعديت عليه واخدته علي الموتوسيكل من قدام المستشفي العام وكنا لوحدنا'.

وأضاف المتهم في اعترافاته:'لما وصلنا عند الترعة قولتله إنت مش ناوي تحل الموضوع ده أنا مش هسيب حقي فأخرج صديقي سكين من هدومه وحاول التهجم عليا لكن قاومته حتى سقط على الأرض وسقط السكين من يده فأخذته وطعنته في رقبته ومات علطول'.

استكمل المتهم:'لما لقيته قطع النفس ومات ربطته بحبل على وسطه وعلقته في عصا كانت معي طولها حوالي 2 متر ورميته في الترعة عشان جثته متطلعش تاني ومحدش يعرف إللي حصل لأن الكل شافني معاه قبل الواقعة بدقائق'.

وكانت الأجهزة الأمنية بمديرية أمن الغربية تلقت إخطارا من مأمور مركز شرطة المحلة الكبرى، بالعثور على جثة شاب في الثلاثينات من العمر مذبوحا وملقى في مصرف ري سندسيس بجوار قرية البنوان التابعة لدائرة مركز المحلة الكبرى بعزبة المشوبر شهر ديسمبر الماضي .

وانتقلت الأجهزة الأمنية وشرطة النجدة وقوة من مباحث مركز المحلة الكبرى إلي موقع البلاغ ليتبين أنها لشاب يدعى سامح أحمد، يبلغ من العمر ٣٠ سنة، ومقيم بقرية طرينة التابعة لدائرة المركز وسبق تقدم شقيقه ببلاغ بتغيبه عن المنزل منذ عدة أيام.

بتوقيع الكشف على الجثة تبين وجود أثار جرح قطعي بالرقبة نتيجة استخدام سلاح أبيض، أودى بحياته فى الحال.

وبالتحريات جرى كشف غموض الواقعة وضبط المتهم، ويدعى 'م.ل' ٣٨سنة، ويعمل صيادا وصديقا للمجني عليه بارتكاب الجريمة لوجود خلافات بينهما على أماكن الصيد في المياه.

جري إحالة المتهم إلي محكمة جنايات المحلة الكبري عقب انتهاء تحقيقات النيابة العامة بتهمة القتل العمد.