مصطفى بكري: "عايزين تغيير في الوجه والسياسيات.. ولازم ندى الشعب أمل"

أكد الإعلامي مصطفى بكري؛ أن الدولة تحتاج في الوقت الحالي إلى تغيير حقيقي في الوجوه والسياسات في ظل الولاية الجديدة للرئيس عبد الفتاح السيسي.

وقال بكري خلال برنامج 'حقائق وأسرار' المذاع على قناة 'صدى البلد': 'احنا محتاجين تغيير حقيقي في البلد؛ تغيير في الوجوه والسياسات؛ أنا في ولاية جديدة وفي زمن جديد وأمام رئيس محل اجماع من الشعب المصري عايزين نساعده عايزين القاطرة تعدي عايزين نجيب حكومة أفضل من حكومة عايزين نجيب كوادر أفضل من كوادر'.

وأضاف: 'عايزين ندي للشعب المصري إحساس بالأمل؛ لازم يبقي موجود والامل لما اخلقه يبقي بضمن جبهتي الداخلية واضمن عدم وجود قوى خارجية تخترق هذا الشعب العظيم؛ الأمل بيدينا القدرة على العطاء؛ الكام قضية فساد اللي انضبطوا أدى الناس أمل'.

وتابع: 'احنا بنتكلم بمنطق المصلحة الوطنية مش ضد فلان ولا علان؛ أحنا قدام جمهورية جديدة أتكلم عنها الرئيس السيسي أكتر من مرة؛ جمهورية الصراحة والشفافية أنا ميهمنيش الوزير الفلاني أنا يهمني البلد وفريق العمل اللي مع السيد الرئيس يبقي قادر على الإنجاز'.

وواصل: 'لو كنا عايزين نتغلب على الازمة الاقتصادية لازم يكون عندي مجموعة اقتصادية فاعلة ويكون عندي ناس على قدر المسؤولية وكفاية الناس تعبت؛ عايزين تغيير في كثير من أنماط الحياة؛ كل واحد بيؤدي دور الشخص الكويس هيبقي في موقعه واللي لم يؤدي لازم يروح'.

وأوضح: 'المحافظين قاعدين من 3-4 سنين مستنيين امتى هيمشوا أو يقعدوا؛ هل يصح في محافظ البحيرة داخل على 3 سنين معنديش محافظ؛ هل دة ينفع؟ أنا النهاردة لما غيرت بتاع حماية المستهلك أنا جالي المهندس إبراهيم السجيني شغال وبيروح وشغال ليل نهار وبينزل؛ التغيير للأفضل وبيدي دماء جديدة ولا يجب أن ننتظر لغاية ابريل او غيره'.

واختتم: 'أنا عندي يقين أن سيادة الرئيس بيدرس الان كل كبيرة وصغيرة في المرحلة الجديدة مرحلة جديدة لها سمات جديدة وهي مرحلة مزيد من الاستقرار الاقتصادي ومكافحة الفساد واختيار القادرين على أن يكونوا جسر تواصل حقيقي بين القيادة والناس؛ أحيانا في ناس بتقفل مكتابها مبتشوفش حد'.