"الدنيا كانت صعبة".. أول تعليق من مدرب الزمالك الجديد بعد التأهل لنهائي كأس مصر

كتب – معتز عباس:

أعرب الكابتن معتمد جمال المدير الفني المؤقت لفريق كرة القدم بنادي الزمالك، عن سعادته بالتأهل إلى نهائي كأس مصر، بعد تخطي عقبة فريق بيراميدز بركلات الجزاء الترجيحية 4/3.

واستطاع فريق الزمالك الفوز على بيراميدز بركلات الجزاء الترجيحية بعد انتهاء الوقت الأصلي بالتعادل 3/3، خلال المباراة المثيرة التي أقيمت بينهما على ملعب استاد القاهرة في نصف نهائي كأس مصر.

وقال 'معتمد جمال'، في تصريحات لفضائية 'اون تايم سبورتس': 'الحمد لله الدنيا كانت صعبة مكنش ينفع اتكلم قبل الماتش وكل ما تسد حتة تطلع مشكلة في حتة، عندنا مشاكل وإصابات كتيرة وغيابات ومعظم الدكة اللي موجودة ناس مش جاهزة وسليمة 100%'.

وأضاف، قائلًا: 'شكرًا لكل اللاعبين على دعمهم وكل الناس عايزة تبقى موجودة وتطلع احسن حاجة عندها في الملعب'، متابعًا: 'أنا عازر اللاعيبة لأني شوفت فرقة تانية وفي الشوط الإضافي كان في 7 لاعبين مش موجودين في الملعب'.

وأكمل: 'انا بعد ما استلمت مهمة تدريب الفريق واشتغلت اليومين دول على تثبيت نفس طريقة اللعب القديمة، لكن مع تغيير بعض مراكز اللاعبين مثل أحمد السيد زيزو، وأوباما اللي لعب في ماتش بيراميدز في 4 مراكز، هو دا نادي الزمالك ودا حقه علينا وأنا مقدرش أقول لأ للزمالك'.

وتابع: 'كنا بندرب على ضربات الجزاء، وفي لاعيبة مش قادرة تشوط ضربة الجزاء، لذلك ترتيب المسددين لركلات الترجيح اتغير قبل التسديد مباشرة'.

ويقام نهائي كأس مصر يوم الأربعاء 13 مارس بين الأهلي والزمالك، حيث يمتلك الأهلي 38 بطولة في رصيده، ويطمح الزمالك في اقتناص البطولة الـ29 في تاريخه.