عمرو أديب: الحد الأدنى للأجور 6 آلاف جنيه لا يطبق ولسه شغالين بـ3000

أكد الإعلامي عمرو أديب، أن على الحكومة أن تقوم بطرح حزم اجتماعية جديدة للفئات الأكثر احتياجا لمواجهة الآثار المرتبة على التضخم وارتفاع الأسعار.

وقال أديب، خلال برنامج 'الحكاية' المذاع على قناة 'إم بي سي مصر': 'أنا كمواطن ماذا أفعل؟ بين قوسين عايز أقول لحضراتكم أن حتى الآن بردو إخواننا في القطاع الخاص في جزء منهم معندوش رحمة ولا تقدير ولغاية دلوقتي الحد الأدنى للأجور اللي هو 6 آلاف جنيه لا يطبق ولسه شغالين بـ3 آلاف جنيه'.

وأضاف: 'الناس بتشتغل شغلانة واتنين وتلاتة ماذا يفعل الناس؟ أنا بقول لحضرتك هذه الشكوى وأكيد السادة في مجلس الوزراء والسيد رئيس الوزراء وكل الناس سامعة الكلام ده وعارفة أن هناك غلاء وصعوبة إنما الحاجة بقي اللي مفروض تتعمل ودي الصندوق بردو قالهالك، قالك خلي بالك من التضامن الاجتماعي والطبقات الموجودة في المجتمع قالك كده بردو الصندوق زي ما قالك حاجات تانية كتير أنت لم تفعل فيها أي شيء حتى الآن زي تخارج الدولة والشفافية وكل الحاجات اللي قالك عليها دي لم تحدث حتى الان'.

وتابع: 'أنت لازم تاخد بالك بردو جنبا إلى جنب يجب أن تجهز حزما اجتماعية واقتصادية عشان الناس تعرف تعيش مش منها زيادة الأجور لأن زيادة الأجور في المطلق تعمل تضخم أكبر'.

وواصل: 'المصانع حاول تقلل عليها الضرايب أي مصنع جبنة لما يلاقي فاتورة الكهربا زدات وفاتورة النقل زادت كيلو الجبنة هيبقي بسعر تاني ولكن اما تيجي تقوله أنا واقف معاك هقلك الضرائب شوية والمواطنين هنشوف لهم طرق للتضامن الاجتماعي وهنشوف ازاي نقلل ونرفع حد الإعفاء الضريبي، والمدارس نشوف لها طريقة أن ميبقاش في صرف أكبر'.

وذكر: 'لازم يبقى في حزم اجتماعية للناس لأن الناس هتجيب منين؟ أنت كحكومة هات أعمل والحكومة بتقولك هو أنا باخد الفلوس بوديها فين ما كلها ليك طيب ليا فين أنا هقدر أصرف إزاي أنا هقدر أعيش إزاي أنا هقدر أعلم العيال إزاي؟ طيب قلل الجمارك حتى على الواردات شوية'.

واختتم: 'ايه الشيء اللي بتجهزه عشان الناس تقدر تعيش؟ على فكرة بكرة العيش السياحي هيزيد أنا عارف أن الرغيف أبو ريال موجود ولكن أنت النهاردة زي ما ظبطناه المرة اللي فاتت ونط الرغيف بقي باتنين جنيه'.