مصطفى بكري يهاجم الحكومة بسبب "قانون الإيجار القديم": بتدفعوا البلد للفوضى ليه؟

أكد الإعلامي مصطفى بكري، أن مشروع قانون الإيجار القديم الذي إحالته الحكومة إلى مجلس النواب سوف يتسبب في أزمة مشيرا إلى أن الحكومة لم تراعي البعد الاجتماعي والاقتصادي للموضوع.

وقال بكري خلال برنامج 'حقائق وأسرار' المذاع على قناة 'صدى البلد': 'أنا معرفش مين كتب القانون ده ومين حطنا في المأزق ده ومين اللي بيزايد على حكم الدستورية العليا، يا جماعة احنا كده بنتسبب في ازمة للملاك والمستأجرين، راعوا الوضع الاجتماعي والاقتصادي لمصر وراعوا أن في رئيس شغال 24 ساعة بيحاول يوقف البلد على رجليها'.

وأضاف: 'كل اللي بتعملوه ده كأنهم بتدفعوا البلد للفوضى ليه؟ ولمصلحة مين ولحساب مين مع احترامي وتقديري لكل جهد يبذل ولكن إن مكانش عندي حس سياسي واقرأ الخريطة جيدا أنا هكرر اللي حصل قبل كده'.

وواصل: 'أوعوا تراهنوا على صبر الناس أوعوا تراهنوا أن الناس ساكته والناس ساكته عشان الرئيس بيديهم الأمل وانتوا باللي بتعملوه ده بتطفوا الامل، أه أنتو قلتوا القانون في المجلس عندنا خلاص أنت رميت كرة اللهب للمجلس ماشي هنشيلها مع أننا معملناش لا استجواب ولا قلبنا الدنيا طيلة الدورة البرلمانية'.

وأوضح: 'احنا بردو ناس طيبين بس اياكم أن تتصوروا أن كل قانون تجيبوه ممكن يعدي واحنا بردو كنواب مصلحة البلد فوق كل اعتبار ودايما علينا أن نرشد الحكومة ودي مهمتنا ونقولها ده صح ودا غلط واحنا مع الناس مش في أبراج عاجية وشايفين حالة الهيجان الموجودة اللي مش في مصلحة البلد واللي مش شايف كده يبقي مبيشوفش'.