خيري رمضان لاتحاد الكرة: "وفروا فلوس المدرب متضيعوش الدولار"

طالب الإعلامي خيري رمضان، بمنح الفرصة لمحمد يوسف المدير الفني المؤقت للمنتخب الوطني خلال العام الحالي وعدم التعاقد مع مدير فني أجنبي.

وقال رمضان خلال برنامج 'مع خيري' المذاع على قناة 'المحور': 'اتحاد الكرة منذ قليل قال لفيتوريا باي باي الحمد لله يارب فيتوريا مشي بعد ما خد الـ 600 ألف دولار وفي ناس بتقول أكتر من كدة شوية ولكن أنتوا فاهمين حد هيعبر الجمهور ويقولك فيتوريا كان بياخد كام؟ والعقد أهو؟ مش ممكن يورونا دة لأن مفيش شفافية لأنهم كدابين'.

وأضاف: 'انتوا عارفين مصر هتلعب في 2024 كام ماتش؟ هما ماتشين في شهر ستة في تصفيات كأس العالم أمام بوركينا فاسو وغينيا؛ كنت هقعد مدرب من شهر يناير إلى ديسمبر ياخد 2.5 مليون دولار وهو مدرب فاشل عشان ماتشين'.

وتابع: 'اتحاد الكرة أعلن تعيين الكابتن محمد يوسف مديرا فني؛ جابوا محمد يوسف ليه؟ محمد يوسف مدرب كويس ولكن بقاله فترة مش بيدرب؛ كان مديرا فنيا للنادي الأهلي وخد معاه بطولات ودرب الشرطة العراقي وبتروجيت؛ ودلوقت هو محلل فني لقناة المحور مع النجم ميدو ومحمد بركات'.

وواصل: 'خدوه النهاردة مدير فني مؤقت؛ ليه جابوا محمد يوسف مش علي ماهر أو حسام حسن لأن دول مرتبطين بفرق واتحاد الكرة مبيرتاحش ألا لما يطلع دولارات؛ يقولك نعدي ويجي شهر ستة لو اتغلب أو اتعادل يجي محمد يوسف كاتبين مؤقت في القرار مش جايبينه عشان يستمر'.

وأوضح: 'التصرف الصح أنك تجيب مدرب مستقر تقف وراه وتقله عندك السنة فرجنا على الأداء ويقولك عايز مباريات وديه تقيلة مش المباريات السكة اللي كنا بنقابل فيها فرق ضعيفة عشان نقول فيتوريا بيكسب ادي لمحمد يوسف الثقة وشوف هيعمل ايه؛ كفاية دولارت لبرة مش هناخد حاجة في كأس العالم'.

وذكر: 'وفروا الفلوس السنادي والسنة الجاية يحلها الحلال؛ الدنيا مطارتش مصر محتاجة لكل دولار؛ متضيعهوش في الكورة والعمولات والسمسرة'.

وكان اتحاد الكرة قد أعلن توجيه الشكر للبرتغالي روي فيتوريا؛ المدير الفني للمنتخب الوطني وتعيين محمد يوسف مدرب مؤقت.