أحمد موسى: الجولاني لبس الكرافتة لأول مرة ومفيش إرهابي بيتوب

أكد الإعلامي أحمد موسى أنه لا يمكن التعامل المجموعات المسلحة التي تولت السلطة في سوريا، مشيرا إلى أنهم جماعات إرهابية تشكلت من تنظيم القاعدة.

وقال موسى خلال برنامج 'على مسؤوليتي' المذاع على قناة 'صدى البلد': 'الرئيس اللي بيقول لحضراتكم ناخد بالناس كويس أوي والموضوع النهاردة خلاص سوريا خلصت والتركيز على دولة وحيدة وجيش وحيد الدولة المصرية والقوات المسلحة وعندما يكون هذا الأمر بهذه الطريقة لازم ناخد بالنا كويس أوي'.

وأضاف: 'المطلوب إسقاط الدولة مش نظام إسقاط وأحدي القنوات كانت عاملة شعار كده إسقاط مصر، وبيقدمولنا سوريا النهاردة على أن الجولاني وغيره ناس ممكن التعامل معاهم دي صورة بتتقدم من أصحاب الأجندات بتتقدم لينا احنا وللشرق الأوسط والأمم المتحدة وأمريكا'.

وتابع: 'عندكم النموذج في سوريا والنموذج قيادي في تنظيم داعش وقيادي في القاعدة نموذج عايزينه يحكم دولة عربية هيكون أمر في منتهي الخطورة ولازم نبقي واضحين مفيش حاجة اسمها مش هيأثر علينا أمن سوريا من أمننا وسلامة سوريا من سلامة العالم العربي كله'.

وواصل: 'كنا حاجة واحدة أحنا وسوريا واللي بيحصل النهاردة مش طبيعي وما يتم تقديمه مسألة مترتبة ومتجهزة امبارح شوفنا الجولاني قاعد مع قادة المليشيات اللي مفروض هيبقوا في الجيش دول قادة المليشيات اللي كان قائد في داعش أو النصرة أو الجيش الوطني الحر هقول على دول جيش سوري؟'.

وأوضح: 'دا نصهم أجانب غير سوريين، في خطر حقيقي والله الموضوع مش هزار والنهاردة وزير الخارجية التركي رايح للجولاني وهما اللي مرتبينه ومظبطينه وكان بيقابل الجولاني لما كان رئيس للمخابرات'.

وأكمل: 'الجولاني لبس الكرافتة لأول مرة والنهاردة بيقدموه تبدأ الأول ببدلة عسكرية ثم بعد شوية ممكن يحلق دقنه الخطة كده خفف شوية وبعدين احلق دقنك هو ده هينسيك؟ مفيش إرهابي بيتوب ومحدش يضحك عليك'.

واختتم: 'هذه الصورة مزيفة وغير حقيقة وتستهدف الدول والشعوب العربية واللي قدامنا ده أمر خطير وطبعا الأتراك ليهم مصالح والأمريكان والروس وكله النهاردة ليه مصلحة'.