«عرضوا عليه فيلا بدل الفلوس».. إعلامي يكشف تطورات أزمة زيزو والزمالك

تحدّث الإعلامي الرياضي إبراهيم عبد الجواد، عن تطورات موقف أحمد مصطفى زيزو من التجديد للزمالك.

وقال إبراهيم عبدالجواد عبر برنامج ملعب اون على قناة اون تايم سبورت: 'إمبارح أغلب البرامج الرياضية والمواقع ظهرت فيها رواية مفادها أن الزمالك تراجع عن اتفاقه مع زيزو، وعرض عليه فيلا بدل فلوس وكلام كتير على هذا النهج، وأن الإدارة مقصرة.

وتابع: “اللي هنقوله هنا الحقيقة الأكيدة بالوقائع فيما يخص زيزو والواقع، الإدارة عندها رغبة أكيدة في تجديد عقد زيزو ولم تتراجع عن شيء”.

وأضاف: “الحقيقة الثانية ما ذكر عن تراجع إدارة الزمالك في اتفاقها غير صحيح، الإدارة قعدت معاه أكتر من 10 مرات وكل مرة كان بيتم التأكيد ان الزمالك هيجدد ومش هيبيع، والكلام إن يتم استبدال الفلوس بفيلا مش صح، اللي حصل إن حد من المحبين عرض فيلا بشكل إضافي، علشان الدنيا تمشي في ظل الأرقام اللى كانت بتتطرح من والد زيزو كبيرة قوي”. 

وأكمل: “إدارة الزمالك لم تتراجع عن أي بنود اتفقت فيها مالياً مع زيزو وموقف زيزو إنه فعلا عايز يكمل في الزمالك وعنده رغبة كبيرة في إستكمال مسيرته لانه عارف مش هيلاقي الدلع ده كله في اي حته وهتبقى مجازفة ولكن عايز يكمل بمقابل مادي مقارب للي معروض عليها من الخليج”.

وقال ايضا: “بالنسبة لفكرة أن آخر يوم للرد الخميس الكلام ده برضو غير صحيح لأن بالفعل اتأكدنا أن والد زيزو فاتح خطوط اتصال مع أندية تانيه عادي وموضوع الأهلي ليس إلا ورقة ضغط على الزمالك”.

واختتم: 'الخلاصة وهو إن إدارة الزمالك عاوزة تدي لزيزو فلوس كتير اوي لكن رغبة زيزو يحصل على مبالغ تقارب ما كان سيحصل عليه حال رحيله للخليج، وإدارة الزمالك عاوزة تجدد لزيزو وبعدين تفكر في اي حاجة بعد كدة ، سواء إعارة أو بيع في الصيف'.