الضغوط النفسية

'سمحولى قرائى الأعزاء التحدث بالعامية فى هذة المقالة.

يمر جميعنا بضغوط حياتية كثيرة، إما بسبب مشاكل بنقابلها فى الدراسة أو العمل أو فى البيت أو مع المعارف والأصدقاء وغيرها.

وكل الضغوط دى أمر طبيعى وعادى، لأن الحياة مليانة مشكلات وعايزة حلول، وربنا خلق الإنسان فى كبد، لكن فيه من الناس إللى يقدر يواجه الضغوط ويحلها، وناس متقدرش على المواجهة وللأسف بتدمر نفسيا، وهنا تلاقى المشكلة فى إنك إزاى تصمد أمام ضغوطك عشان تقدر تحلها بدون توتر زائد يؤدى لأمراض عضوية ونفسية، مش إزاى تحل مشاكلك بس.

ياترى إزاى تواجه ضغوطك؟

١- متحاولش تصلح الكون كله، دة مستحيل.

٢- متحاولش تحل مشاكلك كلها فى وقت واحد، كدة بتكلف نفسك فوق طاقتها، قسم مشاكلك وحل واحدة واحدة عشان تقدر.

٣- إكتب إللى عايز تعمله فى ورقة، وبعدها إشطب على إللى عملته وخلصته، كدة حتفضى دماغك من زحمة الأفكار.

٤- متقعدش مع حد يحبطك ويزيد ألمك ومشاكلك، إقعد مع ناس إيجابيين ومتفائلين يدوك طاقة إيجابية ويريحوا أعصابك.

٥- بلاش تدى الأمور فوق حجمها الطبيعى عشان متعقدش نفسك.

٦- لو فاكر إنك لوحدك مضغوط تبقى غلطان، كل الناس مضغوطة، ويمكن ده يقلل من مشاعرك السلبية ويحسسك أنك مش لوحدك.

٧- الجلسات الجماعية التدعيمية مهمة لمن لديهم مشاكل مشابهة، بحيث تفيد فى تناقل الخبرات، وكمان المشاركة النفسية مع الآخرين ممكن تخفف من مشاعرك الضاغطة، ممكن تحضر الجلسات دى حتفيدك.

٨- خلى جزء من وقتك ترفيه أو نشاط زى التمارين الرياضية أو الجيم أو حفظ القرآن الكريم أو الإنجيل المقدس أو ممارسة أنواع الفنون المختلفة الملائمة، جميعها أنشطة تقلل من التوتر.

٩- ممكن تشتغل على فنية العلاج بالعمل، لو مضغوط غرق نفسك فى الشغل أى شغل ومتخليش عندك وقت فراغ عشان ميبقاش مدخل للتفكير السلبى.

١٠- متتعشمش فى حد أوى، عشان متتصدمش لو ملقتش فيه ما تتمنى منه.

١١- تدريبات التنفس والإسترخاء وتدريبات التأمل مثل تأمل ضوء شمعة فى غرفة مظلمة أو تأمل البحر أو تأمل بستان وورود أو الإستماع للقرآن الكريم أو لموسيقى هادئة، كلها تقلل التوتر وتجعلك تشعر بالإتزان النفسى'.