الهرشة السابعة

في مسلسل الهرشة السابعة جسّد أكتر من مشكلة في العلاقات الزوجية بشكل حلو أوي بتحصل بالظبط في بيوت كتير.

من أول الزوجة اللي ادت دورها عايدة رياض اللي بعد ٣٠ سنة جواز مش سعيدة في حياتها ومكملة بسبب بنتها وانفجرت بسبب أول مشكلة بسيطة بعد جواز بنتها.

الحوار اللي تم بينها وبين جوزها الفنان محمد محمود إن حياتها كلها بتتلخص في انها بتلبي طلباته بس من غير تقدير من غير شكرا مفيش اي اعتبار لمشاعرها او احتياجتها .. ومفيش اي وجود لأي إحتمالية إنها مش مبسوطة ومجرد إنها إنفجرت وعبرت عن ضيقها إتهمها بالبطر .. مش بتاكلي وبتشربي وعايشة؟ عايزة ايه أكتر من كده ما كل الستات في مصر عايشة علي كده عايزة ايه؟

ولما طلبت الطلاق، مفكرش في إنه مقصر في إيه أو ممكن يحل بإيه .. مفكرش يطبطب ويقولها آسف ويحتوي ضيقها ولا إنه يقولها أنا حاولت أعملك اللي إنتي عايزاه من وجهة نظري، طيب إيه الطريقة المناسبة ليكي او إيه ناقصك وأنا أعمله!

لا هو شاف إنه بيعمل كل حاجة وانه كتير عليها كمان وقالها بس انا هطلقك زي ما إنتي عايزة وهي الحقيقة مش عايزة تطلق بس كمان طاقتها خلصت مش هتقدر تستحمل اللي كانت بتستحمله.

تاني قصة هي قصة بنتها أمينة خليل وجوزها محمد شاهين اللي في اول جوازهم تقريبا بالميللي نفس خناقات كل الأزواج في أول سنين جوازهم .. جملة إنتي عمرك مااتصلتي بيا وقلتي أي حاجة مهمة وكأن العلاقة بين الزوجين بس في الحاجات المهمة .. وفعلا الرجالة بعد الجواز مبيستحملوش رغي مراتاتهم زي ماكانت علي قلبهم زي العسل قبل الجواز وبعد الخلفة صور مشهد الأم اللي قاعدة ليل ونهار لوحدها مع الأطفال ولخصت معاناة كل أم في سيناريو حقيقي' أنا عايزة استحمى! أنا عايزة حد يقدرني ويقول لي برافو إنتي بتتعبي وقدها! عايزة حد لما يشوفني تعبانة ما يقولّيش شكلك متغير اوي ، مرهقة وعاملة كده ليه؟ ما أنا عارفة إني تعبانة ومش في أحسن حالاتي أنا عايزة مساعدة مش تنظير!

عايزة لما أنفجر وأعيط حد يطبطب عليا، مش يقطّمني! معلش ما أنا ما نمتش طول الليل ولما أنيّم واحد التاني يقوم ومشهد مستمر طول اليوم مفيش راحة!

عايزة استحمى وعايزة آكل وعايزة أشرب حاجة سخنة من غير ما أسخّنها عشر مرات وعايزة أنام براحتي عشان أعرف أواصل '

ولحظة الانهيار دي خلصت بإنه احتواها وحضنها وسألها عايزاني اعمل ايه وأنا أعمله وقالها حاضر !

وكان احتياجها بسيط جدا بعد كل الانهيار والضعف ده

قالتله مش عايزاك تنزل وتسيبني لوحدي .. حمي معايا الولاد.

محتاجة تحس انه جمبها وانه بيساعدها ويطمنها بأبسط حاجة ولما عمل ده هي هديت والدنيا مشيت.

لو كان قالها مانا كنت بشتغل وبجيب فلوس وعلي صوته عليها وقالها انها زيها زي اي أن وإن كل الستات بتعمل كده وانتي اللي بتتبطري وبتتدلعي كان زمان الحوار انتهي بطلقني!

الحقيقة مريم نعوم بعبقريتها في الكتابة بسطت مشاكل أغلب الستات وطريقة حلها.

مفيش بيت بيخلي من المشاكل بس المفهوم السائد إن البيت بيفضل صامد ومكمل لو الست إستحملت وسكتت بس ده مش حقيقي .. إن طرف واحد يشيل فوق طاقته لحد ماينفجر ده اكبر غلط وان الفضفضة والنقاش والطبطبة والاحتواء والتقدير هو اللي هيخلي اي مشكلة تعدي.