"بكري" للمسؤولين: "لو دم المصريين رخيص سيبونا"

طالب الإعلامي مصطفى بكري، رئيس الوزراء بالمثول أمام مجلس النواب لتوضيح أسباب وفاة مئات المصريين خلال أداء مناسك الحج.

وقال بكري خلال برنامج 'حقائق وأسرار' المذاع على قناة 'صدى البلد': 'إلى كل قلب حزين في مصر وإلى كل أسرة فقدت عائلها أو أحد أفراد اسرتها وإلى كل مواطن مصري موجوع من اللي حصل لازم نبقى إيد واحدة في الدفاع عن بلدنا وعن الصح في بلدنا وعن القواعد والقانون اللي محطوط وللأسف الشديد مبيترجمش'.

وأضاف: 'حان الوقت أن يسترد المصري كرامته وأن يشعر أن في ناس وراه وأن من جوانا منخدعش بعض، إيه اللي حاصل لينا ليه الناس بقت كده أنت عايز تكسب بأي تمن؟ أمر خطير جدًا وأنا بتمنى أن رئيس الوزراء يجي في مجلس النواب ويقولنا إيه اللي حصل؟'.

وتابع: 'إحنا محتاجين أن الناس تيجي في المجلس وتتكلم لأن دي قضية مش سهلة دا ألف مواطن مصري على الأقل إذا كان دم المصريين رخيص سيبونا، أنا عايز رئيس الوزراء يجيب الوزراء المسؤولين عن هذا الأمر تعالوا وقولوا الحقيقة، يمكن تطلعوا أنتوا صح وإحنا غلط، السيد رئيس الوزراء وأنا بتابع مع مسؤولي مكتب رئيس الوزراء في تحقيقات تتم بشكل مكثف وقوي مع كل الجهات، عايزين نتيجة وعايزين ناس تتقدم للمحاكمة وللنيابة العامة'.

وأوضح: 'عايزين نشوف مين المسؤول مين الموظفين اللي شغالين لا يهمهم مصري ولا يهمهم كرامة البلد دي كل ساعة بتمر بتسبب ألم للمصريين، أنا بتمني الدكتور مصطفى مدبولي يستمع للوقائع الحقيقة ويستدعي ناس من الحجاج ويقدم تقرير للبرلمان وللقيادة السياسية عشان يبقي في إجراءات تتاخد'.

وأكمل: 'الرحمة للشهداء والصبر لأسر كل من استشهدوا وربنا يرجع الغايبين، الناس بتقول عايزين حد يرد علينا ويقولنا في أهلنا وأقاربنا'.