ضغوط الحياة الزوجية

اسمحولي التحدث فى هذه المقالة بالعامية.. بقول لكل الناس الجواز مش لعبة، ومش حاجة سهلة، ومش مجرد أحلام وردية عند الولد والبنت أسطورية، بل هى مسئولية كبيرة عمرية تستمر سنوات العمر الباقية، إن نجحت كانت سنوات العمر الباقية سعيدة ومتزنة ومستقرة، وإن لم تنجح إما يحدث انفصال واهتزاز نفسى، أو تكون بقية أيام العمر ضاغطة ومؤلمة نفسيا.

الجواز يبدأ بتعارف طرفين يحدث بينهم قبول وتقبل هدفها المودة والرحمة، وإقامة بيت أسرى، وحياة سعيدة يملأها الدفء والحنان والأطفال، ويكون هدف الشريكين تنشئة أبناء صالحين وتربيتهم وتعليمهم وتوفير احتياجاتهم، إلى جانب توفير أوقات راحة وترفيه للأسرة، ووقت مخصص للنقاش البناء.

الجواز كمان مش طرفين بس دول عيلتين وعائلات تانية حولهم بيتعرفوا، وعلاقات إجتماعية واسعة أوى، وعلاقة نسب بتقوى مع الوقت، فلازم يكون فيها تفاهم وراحة نفسية.

إزاى تخلى حياتك الزوجية مستقرة؟

1- اختيارك الأساسى للشريك قائم على التدين والأخلاق.

2- التقارب الاجتماعي والتعليمي مهم لتقارب الفكر، لكن ليس قاعدة عامة، لأن بعض الزيجات الناجحة تماما قد تكون من أوساط مختلفة.

3- بلاش بيت عيلة عشان الخناقات والمشاكل.

4- أى مشاكل فى البيت بلاش تتنقل برة وحلوها جوة بيتكم عشان متكبرش.

5- لازم فترات راحة وترفيه عشان الملل والروتين ميأثرش على راحتكم النفسية ويسبب الخرس الزواجى.

6- لازم وقت للنقاش والفضفضة بين الطرفين عشان ميبقاش فيه تراكمات نفسية تكبر مع الوقت.

7- بلاش تهربوا من مشاكلكم بالإنشغال بالفون، وواجهوا المشاكل وحتلاقوا حلول.

8- بلاش تطلعوا هم الشغل على البيت، إللى فى البيت ملهمش ذنب، حلوا مشاكل كل مكان فى مكانه.

9-بلاش خناقات أمام الأطفال عشان ميقلش إحترامهم ليكم مع الوقت أو يقلدوكم.

10- فى بداية الجواز جهزوا على قدر إستطاعتكم بلاش الأوفر (عشان أبقى زى فلانة) كل حد ليه ظروفه، بلاش مقارنات عشان تبقوا مرتاحين وراضيين.

11- الجواز أساسه الحفاظ على الكرامة والاحترام بين الطرفين والأمانة والصراحة والكرم، أما الجواز إللى فيه خيانة أو كذب أو بخل جواز فاشل.

12- لازم تنازلات من كل طرف للآخر عن عاداته قبل الجواز عشان الحياة تمشى، لكن لا تنازل عن الكرامة أو الإحترام، حتى إن لم يستمر الزواج لأى ظرف - لا قدر الله- فسيستمر الاحترام بينهم وتبقى الكرام'.