بالفيديو.. إبراهيم سعيد: شيكابالا مش أسطورة.. وكفاية عليه كده

أكد إبراهيم سعيد نجم المنتخب الوطني السابق، أنه لا يعتبر محمود عبد الرازق شيكابالا لاعب الزمالك أسطورة كما يروج مشجعي الفريق الأبيض.

شيكابالا كبر

وقال سعيد، خلال برنامج 'العرافة' المذاع على قناة 'النهار': 'شيكابالا كبر، ودا رأيي الشخصي، يتسمع بيه أو لأ دي حاجة بتاعتهم، أنا بقول شيكابالا كفاية عليه كده، أنا بقول وجهة نظري واحد مش قادر يجري والبدني بتاعه قليل'.

وأضاف: 'أحمد حسن اتكلم عليا فرديت عليه وأنا رد فعل مش فعل، وموضوع شيكابالا دا أنا بتكلم على أي حد، انتوا شايفينه أسطورة دا براحتكم، أسطورة على أساس إيه معلش؟ محمد صلاح يتقال عليه أسطورة وكابتن محمود الخطيب وحسن شحاتة وحسن حمدي وحسام حسن'.

وتابع نجم المنتخب الوطني السابق: 'أنا مليش دخل بالتطبيل، أسطورة على إيه هل خد دوري الابطال؟ أنا ككورة بقول إنه مش أسطورة، ومش أي حد يتقال عليه أسطورة، وفي النادي الأهلي حاليًا مفيش حد يتقال عليه أسطورة'.

وواصل: 'أحمد حسن اتكلم في تصريح، وأنا بحبه جدًا ولكن في عز خلافاتي في الحتة الفنية دائمًا بقول الكابتن أحمد حسن من ضمن نجوم الكرة المصرية'.

حياتي كلها في الأهلي

وأكمل سعيد: 'الفترة اللي طلعت فيها اتكلمت على الأهلي، أنا عشت واتربيت في الأهلي وحياتي كلها في الأهلي، أنا عشت في الأهلي أكتر ما عشت في بيتي، وطبيعي إني أزعل، أنا أهلاوي جدًا ومتعصب كمان، الناس مبتاخدش في الحسبان إني أبقي زعلان من المكان اللي اتربيت فيه'.

وذكر: 'أنا مكنتش عايز أمشي من الأهلي، وهما كانوا عارفين الكلام ده، وأنا مشيت غصب عني وهما عارفين إني أهلاوي ومتعصب'.

واختتم نجم المنتخب الوطني السابق: 'محصلش إن كابتن طارق سليم ضربني، ولكن لو حصل وضربني فده شرف ليا، ولكن الأسلوب ده مش موجود في الناس الأهلي، كانت في مشادة مع كابتن وليد صلاح الدين وأنا اعتذرتله وقتها، وبعتذرله تاني دلوقت، أنا لم أتمرد على النادي الأهلي، ولكن إيه المشكلة إني اتدلع في بيتي؟ أنا كان نفسي المعاملة تبقى زي اللاعيبة اللي مش ولاد النادي وراحوا ورجعوا، كنت هعيش في الأهلي وأموت في الأهلي، وأنا خلاص مسامح على فكرة'.