بعد اعتذار محمد سلام عن زواج اصطناعي.. عمرو سلامة: السينما مش أجور مستفزة

علق المخرج عمرو سلامة على اعتذار الفنان محمد سلام عن المشاركة في مسرحية زواج اصطناعي عبر حسابه الرسمي بموقع «X» خلال الساعات القليلة الماضية، وذلك بعدما تصدر المشهد عبر منصات التواصل الاجتماعي ما بين مؤيد ومعارض لموقفه.

وكتب عمرو سلامة عبر حسابه الرسمي بموقع «X»: «السينما مش أجور مستفزة لفنانين وفستان على سجادة حمرا»>

وأضاف عمرو سلامة: «الطرف الآخر انتصر وبينتصر وكسب تعاطف العالم لإنه تحكم في السردية العالمية، تحكم فيها بالفن أولا وثانيا وثالثا، الفن اللي أعرقه بقصصه وحكاياته، وقدر بيهم يتحكم في وعي العالم كله، وبعد الفن استخدم إعـلام وسياسة وسـلاح ورأس مال، بس كان وسيلته الأهم الفن».

وأضاف: «السينما والفن صناعة، ١٠ في المية من العاملين فيها بياخدوا أجور عالية نسبيا آه، ولكن ٩٠٪ من العاملين فيها ناس بتجري على أكل عيشها وعايشة بالكاد، لو توقف الفن الناس ديه هتجوع مش هتدفع أقساطها ومش هتاكل عيالها».

وتابع: «ماينفعش تروح لراجل في مصلحة حكومية وتقوله امضي لي ورقة فيقولك مش قادر بسبب أحداث سياسية دموية مأثرة عليا، ماينفعش تقول لميكانيكي صلحلي العربية يقولك مش قادر صور الدمــار مأثرة فيها».

وواصل: «هو آه إسمه ترفيه بس هو صناعة، طالما مانتاش ماسك ســلاح بتحــارب العـدو في أرض المعـركة دورك تشتغل وتعمل دورك في المجتمع، لان ده اكل عيشك واكل عيش ناس كثير غيرك».

وتابع: متفهم جدا اكتئاب أي فنان أو إنسان، وأحترم كل المواقف الشجاعة، ولو عند أي حد رفاهية عدم الشغل وهو مكتئب هيبقى مفيد يريح ويهتم بصحته النفسية، لكني أشعر بس كمان إن علنية المواقف ممكن تئذي ناس كثير غيره وتحط عليهم ضغط لا يستحقوه.

وأردف عمرو سلامة: كل خوفي يكون الفنان نفسه مش مقدر فنه، وعنده صوت داخلي جواه مستهيف الفن أو مستحرمه أو مستحقره، لإن لو الفنان نفسه شايف الفن كده فده يبرر ليه شريحة كبيرة من الناس شايفه الفن كده، رقص وهلس وعري وفلوس ع الأرض وشكرا

وأضاف: الفن في رأيي عمل زي أي عمل، ويضاف عليه إنه قادر على تشكيل وعي البشرية، قادر إنه يطبب عليهم في وقت صعب، قادر إنه يخلينا كإنسانية نفهم بعض أكثر، أنا كلامي أقسم بالله مش نيته مهاجمة حد -خصوصا لو حد بحبه- ولا الدفاع عن حد، هو دفاع عن مهنة فاتحة بيتي، ومهنة بتعطيني سبب للحياة، ومهنة أنا في منظوري شايفها نبيلة، ولو ماكنتش شايفها كده ماكنتش هشتغلها.