هل انسحب الوفد الإسرائيلي المشارك في مفاوضات القاهرة؟

علق الإعلامي أحمد موسى؛ ما تردد عن انسحاب الوفد الإسرائيلي من المفاوضات الجارية حاليا في القاهرة بشأن ابرام صفقة لوقف إطلاق النار في قطاع غزة.

وقال موسى خلال برنامج 'على مسؤوليتي' المذاع على قناة 'صدى البلد': 'النهاردة لقيت بعض وسائل الاعلام بتقول مفاوضات القاهرة فشلت والوفد الإسرائيلي مشي وساب المفاوضات؛ سألت النهاردة مسؤول كبير؛ هل الوفد الإسرائيلي مشي من مصر؟ قال غير صحيح'.

وأضاف: 'أعضاء وفود الدول الأربعة موجودين؛ رؤساء الوفود قعدوا امبارح وبعد كدة في مجموعات العمل من الأربع وفود؛ مصر وأمريكا وقطر وإسرائيل؛ والمجموعات شغالة لإنجاز الصفقة'.

وتابع: 'الامر الاخر سألت أيضا هل الامر يتعلق بوقف إطلاق النار لمدة 6 أسابيع وقالي هو بالفعل المرحلة الأولى بنتكلم عن 6 أسابيع؛ وهناك بتكلم على معلومات؛ مفاوضات القاهرة شغالة بشكل إيجابي للغاية ودة على لسان مسؤول كبير؛ تأكيدا على أن المسائل ماشية والإجراءات ماشية والمفاوضات ماشية من خلال مجموعات العمل'.

وأوضح: 'مجموعات العمل المصرية والأمريكية والقطرية والإسرائيلية شغالين على كل التفاصيل؛ وكل بند من أوراق العمل المقدمة بيشتغلوا عليها ولسه قدامهم لحد بكرة أو يمكن لحد الجمعة؛ وبالتالي مفاوضات القاهرة شغالة؛ المفاوضات ان شاء الله نتمناها تحقق اللي كل الدنيا عايزاه واللي عايزه أولا الشعب الفلسطيني'.

وأكمل: 'في ناس تريد لهذه الصفقة ألا تنجح؛ طيب انتوا عايزين ايه لو منجحتش؛ ياجماعة ساعدوا لوقف إطلاق النار لو حتى شهر ونص أو شهرين؛ ليه في ناس مش عايزة وفي ناس مدايقة أن الموضوع في القاهرة؛ أحنا عايزين وقف إطلاق نار وعايزين ندخل المساعدات ونحل الازمة؛ ولقيت ناس بتكلم ومش هقول أسماء لأنهم لا يستحقوا؛ قالك أهو شوفت مشيوا بتوع إسرائيل ومصر معملتش حاجة'.

واختتم: 'لا يا سيدي مصر بتعمل كل حاجة بس أنت متعرفش؛ لانك عايش برة وهربان لكن انا بكلمك عن اللي بيحصل على الأرض بكلمك على معلومات وبلدنا بتشتغل بمنتهي القوة في هذا الأمر وإن شاء الله يتم الإنجاز على الأقل نحقق جزء كبير جدا من المطروح على الطرابيزة؛ الوفود موجودة ولكن رؤساء الوفود مشيوا'.