أحمد موسى: بعض البرامج مش هتقدر تطلع هوا بسبب حريق سنترال رمسيس

أكد الإعلامي أحمد موسى أن حريق سنترال رمسيس أثر على أغلب خدمات الاتصالات، مشيرا إلى أن الجهود حاليا تنصب على اخماده.

وقال موسى خلال برنامج 'على مسؤوليتي' المذاع على قناة 'صدى البلد': 'أقوال بتتكلم على إنه بدأ في الدور السابع، ولكن لسه مش حاجات رسمية، لأنه حتى الآن ما طلعش بيان رسمي، يعني دلوقتي ما فيش بيان رسمي موجود دلوقتي'.

وأضاف: 'الحماية المدنية شغالة، موجودة، عندهم معدات توصل للطوابق العليا، مش 10 أدوار، 20 و30 دور، فهنشوف الكلام ده قدام حضراتكم أهو أجهزة الدفاع المدني تتحرك، أدي معدات الدفاع المدني، وزي ما بيقول كده الحريق بقاله حوالي ساعتين، ولكن أثر على خدمات شبكات الاتصالات'.

وتابع: 'يعني عشان نبقى عارفين، هذا الحريق أدى إلى تأثر جزئي لخدمات الإنترنت وشبكات الاتصالات، سواء الأرضية أو تليفونات الموبايلات أو المحمول، شبكات الاتصالات، فيه تأثر كبير في مناطق من القاهرة والجيزة وبالتالي كل خدمات الإنترنت كلها عندها فيها مشكلة حاليا'.

وأكمل: 'زملائنا اللي موجودين في الموقع مش عارفين نطلع بيهم هوا من هناك، لأنه فيه عطل ضرب الشبكة، فمش عارفين نطلع هواء، يعني لدرجة إنه في ممكن بعد بعض البرامج النهارده مش هتعرف تطلع هواء، نتيجة لارتباطها باتصالاتها بالإنترنت، وبالتالي يبقى عندهم مشكلة'.

وذكر: 'لكن زي ما إحنا بنشوف كده، حريق عامل يعني دوشة كبيرة جدا، لأنه زي ما بقول لحضراتكم المكان طبعًا رمز، مكان تاريخي هذا المكان هو مكان مبنى تاريخي موجود في شارع رمسيس، جزء من تاريخ القاهرة'.

واختتم: 'طبعًا عندنا أولادنا اللي بيمتحنوا امتحانات الثانوية العامة، خلاص أكيد بيبقى في عندهم أيضًا، لأنه بيعتمدوا على الدروس والأونلاين وغيره، وبالتالي عندهم بعض المشاكل، فأدى هذا الأمر إلى إشكال لدى بعض الناس. كثير من الناس بتشتكي، رسائل كتيرة جدًا بتتكلم على شبكات الاتصالات، بتتكلم على قطع الاتصالات، ناس عايزة تطمن حتى على أهاليها مش عارفين، لأنه في مشاكل كبيرة'.